Իրանի դեմ ԱՄՆ-ի ռազմական քարոզարշավի արժեքը հասել է 37,5 մլրդ դոլարի, Կոնգրեսում կայացած լսումների ժամանակ հայտարարել է ԱՄՆ պաշտպանության նախարար Փիթ Հեգսեթը, որի խոսքերը մեջբերել է Reuters-ը։
Նրա խոսքով՝ այս գումարը ներառում է ինչպես արդեն կատարված, այնպես էլ մինչև ֆինանսական տարվա ավարտը՝ սեպտեմբերի 30-ը նախատեսվող ծախսերը։
Պենտագոնը չի բացահայտել հաշվարկի մանրամասները։ Նախորդ ամիս ԱՄՆ նախագահ Դոնալդ Թրամփի վարչակազմը Կոնգրեսից հայցել էր մոտ 90 մլրդ դոլարի լրացուցիչ ֆինանսավորում, որի մեծ մասը կապված է հակամարտության հետ։
Հայցը քննադատության է արժանացել դեմոկրատների կողմից։ Սենատոր Փեթի Մյուրեյը հայտարարել է, որ ԱՄՆ նախագահն «սպառնում է էսկալացիայով և հերթական անվերջ պատերազմով», իսկ սենատոր Քիրսթեն Ջիլիբրանդը վարչակազմին մեղադրել է հակամարտության ընթացքի վերաբերյալ հակասական հայտարարությունների համար։
Հեգսեթն զգուշացրել է, որ առանց լրացուցիչ ֆինանսավորման Պենտագոնն ստիպված կլինի կրճատել զինծառայողների պատրաստությունը։ Նա նաև կոչ է արել հաստատել գերատեսչության 2027 թվականի բյուջեն՝ 1,5 տրիլիոն դոլարի չափով՝ նշելով, որ դա անհրաժեշտ է ԱՄՆ-ի ռազմական գերակայությունը պահպանելու համար։
Շտաբների պետերի միացյալ կոմիտեի նախագահ, գեներալ Դեն Քեյնն ընդգծել է, որ հակամարտությունը ծանրաբեռնվածություն է ստեղծում Պենտագոնի բյուջեի վրա և կարող է բարդացնել տեխնիկական սպասարկման ու նոր զինատեսակների մշակման ֆինանսավորումը։
ԱՄՆ-ն և Իրանը շարունակում են հարվածներ փոխանակել հրադադարի խափանումից հետո։ Ամերիկյան զինուժը հուլիսի 22-ի դրությամբ 11 գիշեր անընդմեջ հրետակոծել է Իրանի տարածքը։ Բացի այդ, Թրամփը հայտարարել էր թիրախների ցանկն ընդլայնելու հնարավորության մասին։
