Գերմանիայի իշխանությունները երկրում անվտանգության գնահատականը «վերացական սպառնալիքից» բարձրացրել են մինչև «բարձր սպառնալիքի մակարդակ»՝ հետախուզական տեղեկությունների և ահազանգերի ավելացման պատճառով, հայտնում է Reuters-ը։
Գերմանիայի ներքին գործերի դաշնային նախարար Ալեքսանդր Դոբրինդտը Welt am Sonntag-ին հայտնել է, որ երկրում այժմ ցանկացած պահի հարձակումները շատ հավանական են։ Նրա խոսքով՝ Գերմանիայի դեմ հարձակումների ծրագրերը «հստակ տեսանելի են», իսկ թիրախ կարող են դառնալ ենթակառուցվածքները, հաստատությունները և առանձին անձինք։
Դոբրինդտը սպառնալիքի մակարդակի բարձրացումը կապել է գործընկեր հետախուզական ծառայություններից և գերմանական կառույցներից ստացվող տեղեկությունների աճի, ինչպես նաև լրտեսություն և դիվերսիաներ ծրագրող գործակալների ակտիվացման հետ։ Նա ընդգծել է, որ խոսքը դեռ կոնկրետ հարձակման մասին չէ, սակայն վտանգն արդեն չի կարելի բնութագրել միայն որպես «վերացական»։
Վերջին տարիներին Գերմանիայում մի շարք խոշոր հարձակումներ են տեղի ունեցել։ 2024 թվականի դեկտեմբերի 20-ին ավտոմեքենան մխրճվել էր Մագդեբուրգի Սուրբ Ծննդյան տոնավաճառի այցելուների բազմության մեջ։ Զոհվել էր վեց մարդ, այդ թվում՝ իննամյա երեխա, հարյուրավոր մարդիկ վիրավորվել էին։ 2026 թվականի հունիսի 26-ին Մագդեբուրգի երկրամասային դատարանը վարորդին դատապարտել էր ցմահ ազատազրկման։
2024 թվականի օգոստոսի 23-ին Զոլինգենի քաղաքային փառատոնում դանակով հարձակման հետևանքով երեք մարդ էր զոհվել, տասը՝ վիրավորվել։ Դատարանը հարձակումը որակել էր իսլամիստական ահաբեկչություն և 2025 թվականի սեպտեմբերին հարձակվողին դատապարտել ցմահ ազատազրկման։
