ԱՄՆ-ն և Իրանը նոր փոխադարձ հարվածներ են հասցրել միմյանց Պարսից ծոցում, հայտնել է Reuters-ը։
ԱՄՆ նախագահ Դոնալդ Թրամփը հայտարարել է, որ ամերիկյան հարվածները պատասխան էին Իրանի կողմից հրադադարի համաձայնագրի խախտմանը։
«Հնարավոր է՝ գա մի պահ, երբ այլևս չկարողանանք գործել ողջամտորեն և ստիպված լինենք ռազմական ճանապարհով ավարտին հասցնել մեր սկսածը։ Եթե դա տեղի ունենա, Իրանի Իսլամական Հանրապետությունն այլևս չի գոյություն ունենա»,- գրել է Թրամփը սոցիալական ցանցերում։
ԱՄՆ ԶՈւ կենտրոնական հրամանատարության (CENTCOM) տվյալներով՝ ամերիկյան ուժերը հարվածներ են հասցրել իրանական հետախուզական, կապի, հակաօդային պաշտպանության օբյեկտներին, անօդաչու թռչող սարքերի պահեստներին և ականադրիչ նավերին։ Վաշինգտոնի պնդմամբ՝ հարվածները պատասխան էին հունիսի 27-ին պանամական դրոշով նավարկող տանկերի դեմ իրանական անօդաչու թռչող սարքի հարձակմանը։ Իրանական լրատվամիջոցները հայտնել են երկրի հարավում՝ Սիրիկ քաղաքում տեղի ունեցած պայթյունների մասին։
Դրանից հետո Իրանի Իսլամական հեղափոխության պահապանների կորպուսը (ԻՀՊԿ) հայտարարել է, որ ռազմածովային և ռազմաօդային ուժերը հրթիռային և անօդաչու թռչող սարքերի հարվածներ են հասցրել Քուվեյթում և Բահրեյնում տեղակայված ամերիկյան ռազմական օբյեկտներին։ ԻՀՊԿ-ն պնդել է, որ ԱՄՆ-ի գործողությունները խախտել են հրադադարը և «կհանգեցնեն բոլոր դիվանագիտական գործընթացների լիակատար դադարեցմանը»։
Իրանի ԱԳՆ-ն ևս հայտարարել է, որ ԱՄՆ-ն խախտել է պատերազմի դադարեցման մասին համաձայնագիրը և «որևէ նշանակություն չի տալիս իր ստանձնած պարտավորություններին»։
Սա վերջին օրերին ԱՄՆ-ի և Իրանի միջև երկրորդ ռազմական սրումն է։ Ավելի վաղ կողմերը փոխադարձ հարվածներ էին հասցրել՝ հունիսի 25-ին Սինգապուրի դրոշով բեռնատար նավի վրա հարձակումից հետո։
ԱՄՆ-ի և Իսրայելի ռազմական գործողությունն Իրանի դեմ սկսվել էր փետրվարի 28-ին։ Հունիսի 18-ին ԱՄՆ-ն և Իրանը հուշագիր էին ստորագրել երկու երկրների միջև ռազմական գործողությունները դադարեցնելու վերաբերյալ: 14 կետից բաղկացած փաստաթղթով ևս 60 օրով երկարաձգում է ապրիլին կողմերի միջև հայտարարված հրադադարը, որի ընթացքում ԱՄՆ-ն և Իրանը պետք է համաձայնեցնեին վերջնական հրադադարը։ Շվեյցարիայում հունիսի 21-ին ավարտվել էր ԱՄՆ-ի և Իրանի միջև բանակցությունների առաջին փուլը, որը հիմնականում կրել էր տեխնիկական բնույթ։
