Մոսկվան Երևանից որոշում է սպասում Հավաքական անվտանգության պայմանագրի կազմակերպությանը (ՀԱՊԿ) մասնակցության վերաբերյալ, «ՌԻԱ Նովոստի»-ին հայտնել է կառույցում Ռուսաստանի մշտական ներկայացուցիչ Վիկտոր Վասիլևը։
Նա նշել է, որ Հայաստանը պետք է որոշում կայացնի՝ նրանք մնո՞ւմ են կազմակերպությունում, թե՞ նախընտրում են այլ սցենար։ Վասիլևը հավելել է, որ ՀՀ-ն պետք է այդ մասին տեղեկացնի Ռուսաստանին։
ՀԱՊԿ գործունեությանը Հայաստանի մասնակցության հստակեցման վերաբերյալ կազմակերպությունից և պաշտոնական Մոսկվայից մի շարք հայտարարություններ են հնչել։
ՀԱՊԿ-ին մասնակցության սառեցման մասին Փաշինյանը հայտարարել էր 2024 թվականի ապրիլին՝ ընդգծելով, որ 2021-2022 թվականներին կազմակերպությունը չի կատարել Հայաստանի նկատմամբ անվտանգային պարտավորությունները։ 2026 թվականի հունիսին նա կազմակերպությունից դուրս գալը համարել էր հաջորդ տրամաբանական քայլը և հայտարարել, որ ՀԱՊԿ-ի կողմից Հայաստանի հեռացման որոշման դեպքում Երևանը դա կընդունի ի գիտություն։
Հունիսի 10-ին ՌԴ ԱԳ նախարար Սերգեյ Լավրովը հնարավոր էր համարել ՀԱՊԿ կանոնադրության այն հոդվածի կիրառումը, որը նախատեսում է միջոցների կիրառում՝ պարտավորությունները չկատարող անդամների նկատմամբ։ Կազմակերպության գլխավոր քարտուղարի տեղակալ Թաալաթբեկ Մասադիկովը հունիսի 18-ին հայտարարել էր, որ Հայաստանն արդեն 2-րդ տարին է՝ չի վճարում կազմակերպության անդամավճարները։ Նրա խոսքով՝ դե ֆակտո երկիրը գործնականում չի մասնակցում ՀԱՊԿ աշխատանքներին, դե յուրե մնալով անդամ։
