Ռուսաստանից Հայաստան Ադրբեջանի տարածքով տարանցմամբ կուղարկվի 7 վագոն հացահատիկ՝ ընդհանուր 490 տոննա քաշով, հայտնում են ադրբեջանական ԶԼՄ-ները։
Նրանց տվյալներով՝ մինչ այժմ Ռուսաստանից Հայաստան Ադրբեջանի տարածքով արդեն ուղարկվել է ավելի քան 29 000 տոննա հացահատիկ, ավելի քան 7000 տոննա պարարտանյութ, 414 տոննա անտրացիտ, 133 տոննա ալյումին և 68 տոննա հնդկաձավար։ Բացի տարանցիկ փոխադրումներից, Ադրբեջանից Հայաստան է մատակարարվել ավելի քան 13 000 տոննա դիզելային վառելիք, 979 տոննա ԱԻ-92 և 2955 տոննա ԱԻ-95 բենզին։
2025 թվականի նոյեմբերին ռուսական ցորենով բեռնված առաջին գնացքը՝ 15 վագոն, Ադրբեջանի և Վրաստանի տարածքով ժամանել էր Հայաստան, իսկ դեկտեմբերի 19-ին ՀՀ էկոնոմիկայի նախարար Գևորգ Պապոյանը հայտնել էր, որ ադրբեջանական նավթամթերքով 22 երկաթուղային վագոն է ժամանել Ադրբեջան-Վրաստան-Հայաստան երկաթգծով։ Նույն թվականի դեկտեմբերի 24-ին Ռուսաստանը, բացի հացահատիկի տարանցումից, Հայաստանի հետ քննարկում էր Ադրբեջանի տարածքով պարարտանյութերի մատակարարման և բեռների հետբեռնման կազմակերպման հնարավորությունը։
