Միլանի «Ինտերի» կիսապաշտպան և Հայաստանի ֆուտբոլի ազգային հավաքականի նախկին ավագ Հենրիխ Մխիթարյանը հայտարարել է, որ մտադիր չէ կանգ առնել ճանապարհի կեսին և հույս ունի եվրոպական բարձր ասպարեզում հանդես գալ ևս մեկ տարի։ Նա այս մասին հայտարարել է մարզական մեկնաբան Գևորգ Մալաքյանին տված հարցազրույցում։
Իր հարազատ «Փյունիկ» ակումբ կատարած այցի ընթացքում 37-ամյա ֆուտբոլիստն անկեղծացել է կարիերայի հոգեբանական դժվարությունների, ընտանիքից ստացած մեծ մոտիվացիայի մասին և շեշտել, որ ցանկանում է պրոֆեսիոնալ ֆուտբոլին հրաժեշտ տալ բացառապես բարձր նոտայով։
«Այն երիտասարդները, ովքեր մինչ այսօր ինձ հետևում են, իմ տղան, հայրս, ընտանիքս, ինչո՞ւ եմ դա ասում, որովհետև ես ինձ թույլ չեմ կարող տալ կանգնել ճանապարհի կեսին, չավարտել այն ամենը, ինչ սկսել եմ։ Ցանկություն ունեմ ավարտել բարձր նոտայով և հույս ունեմ, որ դեռ մեկ տարի էլ կխաղամ, որից հետո արդեն պարզ կլինի»,- նշել է նա։
Ըստ Մխիթարյանի՝ ֆուտբոլում հաջողության հասնում են ոչ թե պարզապես երազողները, այլ նրանք, ովքեր պատրաստ են քրտնաջան աշխատել։ Նա ընդգծել է, որ տաղանդն առանց կարգապահության և աշխատասիրության չի կարող արդյունք տալ։
«Չկա տաղանդ առանց կարգապահության և չկա կարգապահություն առանց աշխատասիրության։ Եղել են կասկածներ, նույնիսկ հիասթափություններ, բայց դրանք տևել են ընդամենը մի քանի ժամ, երևի՝ մաքսիմում մեկ օր, առավելագույնս, որից հետո իմ մեջ մեծ ուժ եմ գտել, փորձել եմ ինքս ինձ համոզել, որ այն ինչ տեղի է ունենում, զուտ պահ է, պետք է ամեն ինչ անել, որպեսզի այդ հիասթափությունը դառնա հաջողություն»,- նշել է նա։
ԶԼՄ-ները մայիսի վերջին հայտնել էին, որ Մխիթարյանը համաձայնության է եկել ակումբի հետ նոր պայմանագիր ստորագրելու հարցում։ Հունիսին «Ինտեր» ֆուլտբոլային ակումբի մարզական տնօրեն Պիերո Աուզիլիոն ոչ ուղղակիորեն նշել էր, որ հայ ֆուտբոլիստը կշարունակի իտալական ակումբում իր պրոֆեսիոնալ կարիերան։
