Երևանի քաղաքապետարանը ծանուցում է ուղարկել գործարար, «Բարգավաճ Հայաստան» կուսակցության առաջնորդ Գագիկ Ծառուկյանին պատկանող «Մուլտի Ուելնես» ընկերությանը՝ կառուցապատման իրավունքի պայմանագրից հրաժարվելու մասին, հայտնել է «Ժողովուրդ» օրաթերթը։
Ըստ թերթի աղբյուրների՝ քաղաքային իշխանություններն սպորտային համալիրի ղեկավարությանը մեկ ամիս ժամանակ են տվել հողամասն ու շինությունը համայնքին վերադարձնելու համար։
Պարբերականը հիշեցրել է խորհրդարանական ընտրությունների քարոզարշավի ընթացքում Երևանի քաղաքապետ Տիգրան Ավինյանը հայտարարությունը, ըստ որի՝ արձակուրդից վերադառնալուց հետո զբաղվելու է «Ծառուկյանի գործերով»։ Թերթը նշել է, որ ընտրական գործընթացների ավարտից հետո քաղաքապետարանում սկսել են վերանայել հին պայմանագրերը, և «Մուլտի Ուելնեսի» հետ կապված քայլերը կարող են միայն սկիզբը լինել։
Դատախազությունը հունիսի 17-ին դատական հայց էր ներկայացրել դատարան՝ Ծառուկյանին պատկանող մեկ այլ ընկերությունում՝ «Արարատցեմենտում» արձանագրված խախտումների մասով։ Մասնավորապես, դատախազությունը պահանջել էր առոչինչ ճանաչել ընկերության անունով ձևակերպված հողամասի վարձակալության իրավունքի պետական գրանցումը։ Մայիսի 20-ին գործարանի պետականացման մասին իր քարոզարշավի ժամանակ հայտարարել էր վարչապետ Նիկոլ Փաշինյանը։
ԲՀԿ-ից այս գործողությունները քաղաքական հետապնդում էին համարել։
