Իրանի «Խաթամ ալ-Անբիա» զինված ուժերի հրամանատարությունը մեղադրել է Իսրայելին Լիբանանի հետ հրադադարի ռեժիմը խախտելու մեջ և խոստացել է «կոշտ պատասխանել», փոխանցում է «ՌԻԱ Նովոստին»։
Իսրայելական բանակը հունիսի 16-ին շարունակել է հարձակումները Լիբանանի հարավում՝ ԱՄՆ-ի և Իրանի միջև հուշագրի հրապարակումից հետո, որի հիմնական կետերից մեկը Լիբանանում հրադադարն է։
Իրանական Press TV հեռուստաալիքի Telegram ալիքում հրապարակված հայտարարության համաձայն՝ Իրանի զինված ուժերի հրամանատարությունը մեղադրել է Իսրայելին վերջին երկու օրվա ընթացքում Լիբանանի հարավում Բեյրութի հետ հրադադարի ռեժիմը 84 անգամ խախտելու մեջ։
«Մենք զգուշացնում ենք, որ եթե սիոնիստական ռեժիմի (Իսրայելի բանակի - խմբ.) բանակը, որն սպանում է երեխաներին, չդադարեցնի իր վայրագությունները Լիբանանի հարավում, ապա պետք է սպասի Իրանի հզոր զինված ուժերի կոշտ արձագանքին»,- հրամանատարության հայտարարությունը մեջբերում է Press TV-ն։
ԱՄՆ նախագահ Դոնալդ Թրամփը և Իրանի փոխարտգործնախարար Քազեմ Ղարիբ-Աբադին կիրակի օրը հաստատել էին փոխըմբռնման հուշագրի ավարտը, որը նախատեսված է ստորագրել Շվեյցարիայում՝ հունիսի 19-ին։ Իրանի արտաքին գործերի նախարար Աբբաս Արաղչիի խոսքով՝ Իրանի և ԱՄՆ-ի միջև հուշագիրը ներառում է ռազմական գործողությունների անհապաղ դադարեցում բոլոր ճակատներում, այդ թվում՝ Լիբանանում։
Իսրայելի ծայրահեղ աջակողմյան ազգային անվտանգության նախարար Իթամար Բեն-Գվիրը հայտարարել է, որ ԱՄՆ-Իրան համաձայնագիրը ոչինչ չի պարտավորեցնում Իսրայելին։
