ՀՀ Կենտրոնական ընտրական հանձնաժողովն անվավեր է ճանաչել խորհրդարանական ընտրությունների ընթացքում երկու ընտրատեղամասի քվեարկության արդյունքները։ ԿԸՀ նիստն ուղիղ հեռարձակվել է Armenia Today-ի YouTube-յան ալիքով։
Հանձնաժողովը համապատասխան որոշումներ է կայացրել Սյունիքի մարզի Մեղրի համայնքի Ագարակ գյուղում գտնվող 35/65 և Երևանի Նուբարաշեն շրջանում գտնվող 10/51 ընտրատեղամասերի արդյունքների վերաբերյալ։
Հանձնաժողովը եզրակացրել է, որ ընտրությունների օրն ընտրատեղամասերում տեղի են ունեցել խախտումներ, որոնք կարող են էականորեն ազդել արդյունքների վրա և որ ճշգրիտ արդյունքները հնարավոր չէ որոշել։ Ընտրատեղամասերում քվեարկության վերաբերյալ նյութերը կուղարկվեն ՀՀ գլխավոր դատախազություն։
Ընտրության օրն ընդդիմության ներկայացուցիչները տեղամասային երկու հանձնաժողովի գրանցամատյաններում գրառումներ էին կատարել քվեարկության ավարտից անմիջապես առաջ ընտրողների մուտքի վերաբերյալ, որտեղ նրանք մնացել և քվեարկել էին ժամը 20:00-ի քվեարկության վերջնաժամկետից հետո։
Ավելի վաղ տարածքային ընտրական հանձնաժողովները որոշել էին, որ զինծառայողների քվեարկության հետ կապված իրավիճակը խախտում չի համարվում։ Կենտրոնական ընտրական հանձնաժողովն անվավեր է ճանաչել նաև տարածքային հանձնաժողովների այս որոշումները։
Հունիսի 7-ին ՀՀ-ում անցկացվել էին Ազգային ժողովի ընտրություններ, որին մասնակցել էր 18 քաղաքական ուժ՝ 16 կուսակցություն և 2 դաշինք։ ԿԸՀ նախնական տվյալներով՝ 2 503 976 ընտրողից մասնակցել էր 1 477 736-ը (58,94%)։ Նախնական տվյալներով՝ անցողիկ շեմը հաղթահարել էր քաղաքական երեք ուժ՝ «Քաղաքացիական պայմանագիրը» (49,825%), «Ուժեղ Հայաստան» դաշինքը (23,281%) և «Հայաստան» դաշինքը (9,934%)։
