Ռուսաստանը կարող է ընդլայնել Հայաստանից ձկան մատակարարումների սահմանափակումները՝ նոր անասնաբուժական ռիսկերի հայտնաբերման դեպքում, իսկ իշխանի ներմուծման պակասող ծավալները փոխարինել այլ երկրներից, այդ թվում՝ Թուրքիայից մատակարարումներով, հայտնում է ՏԱՍՍ գործակալությունը՝ հղում անելով ՌԴ ձկնորսության դաշնային գործակալության (Росрыболовство) Ռոսձկնորսության ղեկավար Իլյա Շեստակովին։
Գործակալությունը հիշեցրել է, որ Ռուսաստանն արդեն սահմանափակումներ է սահմանել Հայաստանից կենդանի ձկան մատակարարումների նկատմամբ։ Սակայն, բացի կենդանի ձկից, Հայաստանը Ռուսաստան է մատակարարում նաև սառեցված ձուկ։
«Եթե հայտնաբերվեն գործոններ, որոնց դեպքում կարող են առաջանալ անասնաբուժական ռիսկեր և այդ ձուկը մատակարարվելիս կազդի մեր անասնաբուժական անվտանգության վրա, ապա, անշուշտ, կլինեն նաև հետագա քայլեր»,- նշել է Շեստակովը։
Շեստակովի խոսքով՝ Հայաստանն իշխանի ներմուծման հարցում զգալի մասնաբաժին է զբաղեցրել, սակայն հնարավոր սահմանափակումները չեն ազդի Ռուսաստանի ներքին շուկայի հագեցվածության վրա։ Նա նաև նշել է Ռուսաստանում իշխանի սեփական արտադրության բավարար ծավալների և այլ երկրներից, այդ թվում՝ Թուրքիայից ներմուծման հնարավորությունների մասին։
Մոսկվայի և Երևանի հարաբերությունները լարվել են՝ հայկական կողմից ՀԱՊԿ գործունեության քննադատության և Հայաստանի՝ Եվրամիության հետ կապերի ընդլայնման շուրջ հայտարարությունների ֆոնին։
Այս փուլում ՌԴ-ն սահմանափակել է ՀՀ-ից մի շարք ապրանքների ներմուծումը, կասեցրել ՌԴ-ում գտնվող խմբաքանակների իրացումը։ Ապրանքների թվում են ծաղիկները, «Ջերմուկ» հանքային ջուրը, խմիչքի առանձին խմբաքանակներ, մրգեր, բանջարեղեն, ինչպես նաև չրեր։ Հայկական ընկերությունների կողմից ձկան և ձկնամթերքի ներկրումը կասեցվել էր հունիսի 1-ին։
