Ազգային ժողովի ընտրությունների ընթացքում, ժամը 20:00-ի դրությամբ, արձանագրված իրավախախտումների շրջանակում ձերբակալվել է 18 անձ, հայտնում է Ներքին գործերի նախարարությունը։
Գերատեսչության տվյալներով՝ արձանագրվել է կրկնաքվեարկության 37 և քվեարկության գաղտնիության հնարավոր խախտման 24 դեպք։ Եվս 6 դեպք վերաբերում է ընտրական իրավունքի իրականացմանը խոչընդոտելուն։ Բացի այդ, արձանագրվել են ենթադրյալ ընտրակաշառք տալու, ընտրատեղամասում սառը զենք կրելու, խուլիգանության և ֆիզիկական ներգործության 1-ական դեպք։ Այս դեպքերով կազմված նյութերն արդեն փոխանցվել են նախաքննական մարմին։
Ենթադրյալ իրավախախտումների վերաբերյալ ստացված 338 տեղեկությունները ներկայումս ստուգման փուլում են։ Նախարարությունից հայտնում են, որ ստուգվում են նաև մամուլում և սոցիալական հարթակներում տեղ գտած համապատասխան հրապարակումները։
ՆԳՆ Միգրացիայի և քաղաքացիության ծառայության տվյալներով՝ ընտրողների լրացուցիչ ցուցակներում ընդգրկվելու դիմում է ներկայացրել 2398 քաղաքացի, որոնցից 1152-ի հայտն է բավարարվել։ Ընտրություններին մասնակցելու նպատակով համայնքներում ժամանակավոր անձը հաստատող փաստաթուղթ է ստացել 1205 քաղաքացի։
Հունիսի 7-ին Հայաստանում անցկացվել են Ազգային ժողովի ընտրություններ, որոնց մասնակցում է 18 քաղաքական ուժ՝ 16 կուսակցություն և 2 դաշինք։ Ընտրությանը մասնակցել է 1 476 597 մարդ՝ 2 503 976 ընտրողից: Ընդհանուր մասնակցությունը կազմել է 58,97%:
