Պաշտոնական Մոսկվան արձագանքել է Հայաստանում խորհրդարանական ընտրություններին, սակայն առայժմ խուսափել է գնահատականներ տալ դրանց արդյունքներին։
Կրեմլի խոսնակ Դմիտրի Պեսկովը հայտարարել է, որ Ռուսաստանը սպասում է ընտրությունների վերջնական արդյունքների հրապարակմանը և արձանագրում է ընտրական գործընթացի ընթացքում, այդ թվում՝ բազմաթիվ խախտումների մասին հաղորդումները։
«Սպասում ենք վերջնական արդյունքների հրապարակմանը։ Ֆիքսում ենք բոլոր հաղորդումները, այդ թվում՝ բազմաթիվ խախտումների մասին»,- ասել է Պեսկովը։
ՌԴ ԱԳՆ պաշտոնական ներկայացուցիչ Մարիա Զախարովան հայտարարել է, որ ընտրարշավն ու քվեարկությունն անցել են ընդդիմադիր ուժերի, նրանց աջակիցների և Հայ Առաքելական եկեղեցու նկատմամբ ճնշումների պայմաններում։
«ՀՀ-ում ընտրություններն անցել են ժողովրդավարական սկզբունքների խախտումներով»,- ընդգծել է Զախարովան։
Հունիսի 7-ին Հայաստանում անցկացվել են Ազգային ժողովի ընտրություններ, որոնց մասնակցում է 18 քաղաքական ուժ՝ 16 կուսակցություն և 2 դաշինք։ Ընտրությանը, ԿԸՀ նախնական տվյալներով, մասնակցել է 1 477 736 (58,94%) մարդ՝ 2 503 976 ընտրողից:
Մոսկվայի և Երևանի հարաբերությունները լարվել են՝ հայկական կողմից ՀԱՊԿ գործունեության քննադատության և Հայաստանի՝ Եվրամիության հետ կապերի ընդլայնման շուրջ հայտարարությունների ֆոնին։ Այս փուլում ՌԴ-ն սահմանափակել է ՀՀ-ից մի շարք ապրանքների ներմուծումը, կասեցրել ՌԴ-ում գտնվող խմբաքանակների իրացումը։ Ապրանքների թվում են ծաղիկները, «Ջերմուկ» հանքային ջուրը, խմիչքի առանձին խմբաքանակներ, մրգեր, բանջարեղեն, ինչպես նաև չրեր։
Կարդացեք նաև՝
ԿԸՀ-ն հրապարակել է ԱԺ ընտրությունների նախնական արդյունքները
