Աշխարհի տարբեր երկրներում ծնելիության մակարդակի նվազումը, ի թիվս այլ գործոնների, կապված է բջջային ինտերնետի և սմարթֆոնների լայն տարածման հետ, հատկապես՝ երիտասարդության շրջանում, հայտնել է ՌԲԿ-ն՝ հղում անելով Financial Times-ը (FT)-ին:
FT-ն, հղում անելով փորձագիտական տվյալներին, նշում է, որ թվային տեխնոլոգիաների զարգացումը կտրուկ կրճատել է մարդկանց անձնական շփման ժամանակը։
Ցինցինատիի համալսարանի հետազոտողներ Նաթան Հադսոնը և Էրնան Մոսկոսո-Բոեդոն ծնելիության անկումը կապում են 4G ցանցերի ներդրման հետ: Օրինակ՝ ԱՄՆ-ում և Միացյալ Թագավորությունում ծնունդների թիվն ամենից արագ կրճատվել է հենց այն շրջաններում, որտեղ բարձր արագությամբ կապն ավելի շուտ է հասանելի դարձել:
FT-ն նմանատիպ միտումներ է արձանագրել ամբողջ աշխարհում. ԱՄՆ-ում, Մեծ Բրիտանիայում և Ավստրալիայում երիտասարդների շրջանում ծնելիության կտրուկ անկում էր սկսվել 2007 թվականից, Ֆրանսիայում և Լեհաստանում՝ 2009-ից, իսկ Մեքսիկայում, Մարոկկոյում և Ինդոնեզիայում՝ 2012 թվականից: Գանայում, Նիգերիայում և Սենեգալում զգալի նվազում էր ֆիքսվել 2013-2015 թվականներին:
Նոտր Դամի համալսարանի տնտեսագիտության պրոֆեսոր Մելիսա Քերնիի կարծիքով՝ ժամանակակից թվային մեդիա միջավայրը հանգեցրել է ռոմանտիկ հարաբերությունների կրճատմանը: Ժողովրդագիր Լայման Սթոունն, իր հերթին, նշել է, որ սոցիալական ցանցերը ձևավորում են զուգընկերոջ վերաբերյալ արհեստական չափանիշներ, ինչը դժվարացնում է իրական կյանքում հարաբերությունների հաստատումը: Ֆինն ժողովրդագիր Աննա Ռոտկիրխը հաստատել է, որ հարաբերություններում առկա խնդիրներն առավել հաճախ հանդիպում են սոցցանցերից ակտիվորեն օգտվող երիտասարդների մոտ:
Եվրոստատի կանխատեսմամբ՝ առաջիկա 75 տարվա ընթացքում Եվրոպայի բնակչությունը կկրճատվի 11%-ով (մոտ 53 մլն մարդ): 2025 թվականին նորածինների թվի նվազում էր գրանցվել Ավստրիայում, Իտալիայում և Շվեդիայում, իսկ Գերմանիայում մահացությունը գերազանցում է ծնելիությանը չորրորդ տարին անընդմեջ: Բնակչության կտրուկ նվազում է սպառնում նաև Չինաստանին. տասը տարվա ընթացքում բնակչության թիվը կարող է կրճատվել 60 միլիոնով, ինչը բացասաբար կանդրադառնա երկրի արտադրողականության և սոցիալական ապահովության համակարգի վրա:
