Իրանի արտաքին գործերի նախարար Աբբաս Արաղչին Իսրայելի հետ «համաձայնության մեջ» գտնվող երկրներին սպառնացել է պատասխանատվության ենթարկել։ «Ինտերֆաքս»-ի փոխանցմամբ՝ նա այդ մասին գրել է X սոցիալական ցանցում։
Այս հայտարարությունը հաջորդել է Իսրայելի վարչապետ Բենիամին Նեթանյահուի գրասենյակի հաղորդագրությանը, ըստ որի՝ նա չհրապարակված այց էր կատարել ԱՄԷ և հանդիպել նախագահ Շեյխ Մոհամմեդ բին Զայեդին։ Թեև իսրայելական կողմն այցը որակել էր որպես «պատմական առաջընթաց», ԱՄԷ արտաքին գործերի նախարարությունը կտրուկ հերքել էր այդ տեղեկությունը։
Արաբական պետության արտաքին գերատեսչությունը պնդում է, որ Իսրայելի հետ հարաբերությունները հաստատված են «Աբրահամի համաձայնագրերի» հստակ շրջանակում և չեն իրականացվում գաղտնի ուղիներով։
Լարվածությունն է՛լ ավելի է սրվել The Wall Street Journal-ի հրապարակման ֆոնին, ըստ որի՝ ԱՄԷ-ն գաղտնի օդային հարվածներ էր հասցրել Իրանի տարածքում գտնվող թիրախներին, այդ թվում՝ Լավան կղզու նավթավերամշակման գործարանին։
Իրանի արտգործնախարարի խոսքով՝ Նեթանյահուն հրապարակավ բացահայտել է այն, ինչը Թեհրանի անվտանգության ծառայությունները վաղուց փոխանցել էին երկրի ղեկավարությանը։
Իսրայելն ու ԱՄՆ-ն փետրվարի 28-ին հայտարարել էին Իրանի դեմ լայնածավալ մարտական գործողություններ սկսելու մասին: Ի պատասխան՝ Իրանը հայտարարել էր Իսրայելի և տարածաշրջանում ամերիկյան թիրախների դեմ հրթիռային գործողության մեկնարկի մասին: Մարտի 1-ին Իրանը հաստատել էր երկրի Գերագույն հոգևոր առաջնորդ Ալի Խամենեիի մահը:
