Վանկուվերում կայացած ՖԻՖԱ-ի 76-րդ կոնգրեսում մասնակիցները լռության րոպեով հարգել են մահացած ֆուտբոլային գործիչների, այդ թվում՝ Նիկիտա Սիմոնյանի հիշատակը, հայտնում է Championat.com կայքը:
Կազմակերպիչների խոսքով՝ արարողության ժամանակ ներկայացվել է նախորդ՝ 2025 թվականի մայիսի 15-ի կոնգրեսից հետո մահացած պաշտոնյաների և խաղացողների ցուցակը: Ցանկում ներառված է նաև Ռուսաստանի հավաքականի նախկին գլխավոր մարզիչ Բորիս Իգնատևը:
Սիմոնյանը մահացել էր 2025 թվականի նոյեմբերի 23-ին՝ 100 տարեկան հասակում: Նա համարվում է Մոսկվայի «Սպարտակ»-ի պատմության առանցքային խաղացողներից մեկը և, ըստ ակումբի, մնում է նրա լավագույն ռմբարկուն՝ 160 գոլով: Նշվում է, որ թիմի հետ նա չորս անգամ նվաճել է ԽՍՀՄ առաջնությունը և երկու անգամ՝ ԽՍՀՄ գավաթը:
1958 թվականին Սիմոնյանը խփել էր ԽՍՀՄ հավաքականի առաջին գոլն աշխարհի առաջնության եզրափակչում՝ Անգլիայի դեմ խաղում: Թոշակի անցնելուց հետո նա աշխատել էր որպես մարզիչ՝ մարզելով «Սպարտակը», Երևանի «Արարատը», Օդեսայի «Չորնոմորեցը» և ԽՍՀՄ հավաքականը: Նրա գլխավորությամբ «Սպարտակը» երկու անգամ նվաճել էր ԽՍՀՄ չեմպիոնի տիտղոսը, իսկ «Արարատը»՝ մեկ անգամ։
