Նյու Յորքի քաղաքապետ Զոհրան Քվամե Մամդանին Հայոց ցեղասպանության 111-րդ տարելիցի կապակցությամբ խոսել է նման հանցագործությունների կրկնությունը կանխելու անհրաժեշտության մասին, տեղեկանում ենք X-ի էջից։
«Մենք չպետք է թույլ տանք, որ պատմությունը կրկնվի»,- գրել է Մամդանին:
Նա հիշեցրել է, որ Օսմանյան կայսրությունում սպանվել է 1,5 միլիոն հայ և նշել, որ Հայոց ցեղասպանության հիշատակի օրը պետք է աշխարհին հիշեցնել ատելության, անպատժելիության և անտարբերության հետևանքների մասին:
Նյու Յորքի քաղաքապետը նաև անդրադարձել է Արցախում տեղի ունեցած վերջին իրադարձություններին: Նա հիշեցրել է, որ 2020 թվականին Ադրբեջանը՝ Թուրքիայի աջակցությամբ, հարձակվել է տարածաշրջանի հայ բնակչության վրա, իսկ 2023 թվականին ավելի քան 100 000 հայ վտարվել է Արցախից՝ ցեղասպանական արշավի շարունակության ֆոնին:
Ադրբեջանի ԱԳՆ խոսնակ Այխան Հաջիզադեն խստորեն դատապարտել է Նյու Յորքի քաղաքապետի արտահայտությունները՝ դրանք անվանելով «կեղծ և սադրիչ»: Նա ընդգծել է, որ հանրային դեմքերը պետք է խուսափեն «ապատեղեկատվությունից և չխրախուսեն պառակտումը»:
Ապրիլի 24-ին լրացել է Օսմանյան կայսրության կողմից 1915 թվականին հայերի նկատմամբ իրականացված Ցեղասպանության 111-րդ տարելիցը։ Աշխարհասփյուռ հայությունը ոգեկոչման միջոցառումներով է հիշել 1,5 միլիոն անմեղ զոհերի հիշատակը։ Հայոց ցեղասպանությունը պաշտոնապես ճանաչել է 34 պետություն, ավելի քան 70 կազմակերպություն։ 111 տարի անց Թուրքիան շարունակում է ժխտել Մեծ եղեռնի իրողությունը և պայքարում է Ցեղասպանության միջազգային ճանաչման դեմ՝ նենգափոխելով պատմությունը։
Ստամբուլի իշխանությունները ինչպես հաճախ, այս տարի ևս մերժել էին Հայոց ցեղասպանության զոհերի հիշատակին նվիրված միջոցառման անցկացման թույլտվությունը:
Կարդացեք նաև`
Ականատեսների հուշեր և փաստեր. Հայոց ցեղասպանության մասին գրքերի ընտրանի
Ուրուգվայից մինչև ԱՄՆ. Հայոց ցեղասպանության ճանաչման ուղին
