ԱՄՆ նախագահ Դոնալդ Թրամփը հայտարարել է, որ Իրանը համաձայնություն է տվել Միացյալ Նահանգներին հանձնել 2025 թվականի հունիսին հարվածների ենթարկված միջուկային օբյեկտներում առկա հարստացված ուրանը, գրում է ՏԱՍՍ-ը:
«Նրանք համաձայնել են մեզ փոխանցել «միջուկային փոշին»։ Այն գտնվում է խորը գետնի տակ այն հարվածների հետևանքով, որոնք իրականացրել ենք B-2 ռմբակոծիչների կիրառմամբ»,- ասել է Թրամփը։
The Washington Post պարբերականի փոխանցմամբ՝ «միջուկային փոշի» ասելով՝ ԱՄՆ նախագահը նկատի ունի հարստացված ուրանը, որը, Միջուկային էներգիայի միջազգային գործակալության (ՄԱԳԱՏԷ) տվյալներով, թաղված է գետնի տակ՝ Իսլամական Հանրապետության առանցքային միջուկային օբյեկտներին ամերիկյան հարվածներից հետո։
Ամերիկյան առաջնորդի խոսքով՝ Թեհրանի հետ բանակցություններում առաջընթաց է նկատվում։
«Մենք շատ հարցերի շուրջ ենք պայմանավորվել Իրանի հետ։ Կարծում եմ՝ շատ դրական զարգացումներ կլինեն»,- հավելել է նա։
Թրամփն ապրիլի 10-ին հայտարարել էր, որ Թեհրանն անձնական շփումների ժամանակ պատրաստակամություն է հայտնել հրաժարվել միջուկային զենքից։
Իսլամաբադում ապրիլի 11-ին տեղի էին ունեցել բանակցություններ ԱՄՆ փոխնախագահ Ջեյ Դի Վենսի և Իրանի խորհրդարանի խոսնակ Մոհամմադ Բաղեր Ղալիբաֆի միջև։ Կողմերին չէր հաջողվել համաձայնության գալ հակամարտության երկարաժամկետ կարգավորման շուրջ՝ առկա հակասությունների պատճառով։
