Բաքուն մեղադրում է Իրանին Նախիջևանի վրա ԱԹՍ-ներով հարձակման մեջ և հայտնում վիրավորների մասին, տեղեկացնում են ադրբեջանական լրատվամիջոցները։
Նշվում է, որ ԱԹՍ-ներից մեկն ընկել է Նախիջևանի օդանավակայանի տերմինալի մոտակայքում, մյուսը՝ Շեքերաբադ գյուղի դպրոցի հարևանությամբ։ Օդանավակայանի շենքը վնասվել է, քաղաքացիական 2 անձ՝ վիրավորվել։ Վիրավորներին տեղափոխել են հիվանդանոց, նրանց վիճակը կայուն է։
Ադրբեջանի արտաքին գործերի նախարարությունը հանդես է եկել հայտարարությամբ՝ նշելով, որ Բաքուն իրավունք է վերապահում ձեռնարկել համապատասխան պատասխան միջոցներ։ Ադրբեջանում Իրանի արտակարգ և լիազոր դեսպան Մոջթաբա Դեմիրչիլուն կանչվել է ԱԳՆ։
«Իրանական կողմին ուղղված է խիստ բողոք, նրանց կհանձնվի համապատասխան բողոքի նոտա»,- ընդգծվում է հայտարարության մեջ։
Ադրբեջանի ՊՆ-ն դատապարտել է Իրանի ԶՈւ կողմից քաղաքացիական ենթակառուցվածքների վրա հարձակումները և նշել, որ պատրաստում են անհրաժեշտ արձագանքման միջոցառումներ և այդ հարձակումներն անպատասխան չեն մնա։
Ավելի ուշ Ադրբեջանի նախագահ Իլհամ Ալիևը նույնպես հայտարարել է նախատեսվող պատասխան միջոցներ ձեռնարկելու մասին։ Ադրբեջանի նախագահն անվտանգության խորհրդի նիստում «ահաբեկչական գործողություն» է որակել իրանական դրոնների հարձակումը՝ նշելով, որ «մեղավորները պետք է անհապաղ պատասխանատվության ենթարկվեն»։ Նա հավելել է, որ «Իրանը պետք է բացատրություններ տա Ադրբեջանին և ներողություն խնդրի»։
ՆԱՏՕ-ի գլխավոր քարտուղար Մարկ Ռյուտեն հայտարարել է, որ դաշինքը պատրաստվել է Իրանի դեմ հավաքական պաշտպանության մասին 5-րդ հոդվածի հնարավոր գործարկմանը՝ պատասխանելով հնարավոր միջադեպերին դաշինքի արձագանքի մասին հարցին։
Ադրբեջանի ՊՆ-ն ավելի ուշ հայտարարել է, որ Իրանի գլխավոր շտաբի հայտարարությունն այն մասին, որ Իրանը հարգում է բոլոր երկրների, հատկապես՝ մահմեդական և հարևան պետությունների ինքնիշխանությունը, չի կարող ընդունելի դարձնել «Իրանի կողմից ԱԹՍ-ների հարձակումները»։
Ադրբեջանի ՊՆ-ն նաև հայտնել է, որ Իրանի ԶՈւ-ն 4 ԱԹՍ է ուղարկել Նախիջևան, մեկը խոցվել է, իսկ մյուսը պայթել է դպրոցի մոտ՝ առանց թիրախին հարվածելու:
Ավելի ուշ ադրբեջանական ԶԼՄ-ները հայտնել են, որ Թուրքիայի արտաքին գործերի նախարար Հաքան Ֆիդանն Ադրբեջանի ԱԳ նախարար Ջեյհուն Բայրամովի հետ հեռախոսազրույցում «իր բողոքն է արտահայտել մարտի 4-ին Թուրքիայի, իսկ մարտի 5-ին՝ Ադրբեջանի ուղղությամբ հարձակման վերաբերյալ»։
Հեռախոսազրույցի ընթացքում նշվել է, որ անվտանգության ապահովման նպատակով դեպի Նախիջևան ավիաչվերթերը ժամանակավորապես կկազմակերպվեն Իգդիրի օդանավակայանով:
Ավելի ուշ Թուրքիայի ԱԳՆ-ն դատապարտել է հարձակումը Նախիջևանի վրա։
«Մենք կրկին ընդգծում ենք նման հարձակումների անհապաղ դադարեցման անհրաժեշտությունը, որոնք ուղղված են տարածաշրջանի երրորդ երկրների դեմ և մեծացնում են պատերազմի տարածման ռիսկը։ Թուրքիան, ինչպես միշտ, այսուհետ ևս լինելու է Ադրբեջանի կողքին»,- ասվում է հայտարարության մեջ։
Հարցն այսօր քննարկել են Թուրքիայի արտաքին գործերի նախարար Հաքան Ֆիդանը և Ադրբեջանի արտաքին գործերի նախարար Ջեյհուն Բայրամովը: Պաշտոնական Բաքվի հաղորդմամբ՝ հեռախոսազրույցի ընթացքում կտրուկ բողոք է արտահայտվել Իրանի կողմից Թուրքիայի դեմ երեկ իրականացված հրթիռային հարձակման, ինչպես նաև այսօր Ադրբեջանի վրա անօդաչու թռչող սարքերի հարձակման վերաբերյալ։ Նախարարներն ընդգծել են, որ նման հարձակումներն անընդունելի են։
Իսրայելն ու ԱՄՆ-ն փետրվարի 28-ին հայտարարել էին Իրանի դեմ լայնածավալ մարտական գործողություններ սկսելու մասին: Ի պատասխան՝ Իրանը հայտարարել էր Իսրայելի և տարածաշրջանում ամերիկյան թիրախների դեմ հրթիռային գործողության մեկնարկի մասին: Մարտի 1-ին Իրանը հաստատել էր երկրի Գերագույն հոգևոր առաջնորդ այաթոլլա Ալի Խամենեիի մահը: Երկու կողմում էլ զոհերի թիվը ժամ առ ժամ փոխվում է։
Ավելի վաղ ադրբեջանական ԶԼՄ-ները հայտնել էին, որ Իրանից արձակված ԱԹՍ-ն ընկել է Նախիջևանի տարածքում։ Իրանական կողմը հայտարարել էր, որ Թեհրանը չի թիրախավորում հարևան երկրներին և Ադրբեջանի հետ կապված միջադեպը պետք է հետաքննվի։
Նյութը թարմացվել է 18։34-ին։
