Արեգակի վրա տեղի է ունեցել հզոր բռնկումը, «ՌԻԱ Նովոստիի» փոխանցմամբ՝ այս մասին հայտնել են Ռուսաստանի գիտությունների ակադեմիայի տիեզերական հետազոտությունների ինստիտուտի արեգակնային աստղագիտության լաբորատորիայից:
«Մոսկվայի ժամանակով 08:00-ին անսպասելիորեն Արեգակի վրա բավականին ուժեղ բռնկում է գրանցվել՝ M2.4 բալի չափով»,- պատմել են գիտնականները:
Նրանք նշել են, որ վերջին օրերին Արեգակի ակտիվությունը բավականին ցածր էր, ուստի այսօրվա բռնկումն էապես անսպասելի էր:
«Բացի այդ, բռնկման աղբյուրը գտնվում է հակառակ կողմում և հասկանալ, թե արեգակնային ի՞նչ բծերի խումբ կա այնտեղ, առայժմ անհնար է: Նախկինում Արեգակի վերոնշյալ կողմն իրեն որևէ կերպ չէր դրսևորել, և մինչ այս պահը համարվում էր, որ այնտեղ ընդհանրապես ոչինչ չկա»,- հավելել են լաբորատորիայում:
Երկրի համար բռնկումը որևէ վտանգ չի ներկայացնում, դրան ուղեկցող պլազմայի արտանետումը գնում է այլ կողմ: Մի քանի ժամից պլազմային ամպը տեսանելի կդառնա կորոնոգրաֆներից ստացվող լուսանկարներում, եզրափակել են աստղագետները:
Վերջին անգամ Արեգակի վրա բռնկումներ էին գրանցվել փետրվարի 2-ին։ Գիտնականների խոսքով՝ բռնկումը պատկանում էր ամենահզոր՝ X դասին։
