Պետական պաշտոնյաներին պարգևավճարներ տալը «չպետք է զայրացնի» Հայաստանի բնակիչներին, հայտարարել է ՀՀ ֆինանսների նախարար Վահե Հովհաննիսյանը՝ մեկնաբանելով իշխանության ներկայացուցիչներին միլիոնների հասնող պարգևավճարների շուրջ քննադատություններին։ Նախարարի ասուլիսի ուղիղ հեռարձակումը՝ Armenia Today-ի YouTube-ի ալիքով։
Նրա խոսքով՝ դրանք ոչ այդքան պարգևավճար, որքան աշխատավարձի բարձրացում են այլ եղանակով՝ պիլոտային ծրագրի տրամաբանությամբ։
Հովհաննիսյանը նշել է, որ պաշտոնյաների աշխատավարձերը չեն փոխվել վերջին 5-6 տարիների ընթացքում, մինչդեռ կան խնդիրներ որակյալ մասնագետների ներգրավման տեսանկյունից։ Խնդիրը, ըստ նրա, պետական հատվածի աշխատավարձերի չափն է։
Նախարարը շեշտել է, որ խոսքը ոչ թե աշխատավարձերն ուղիղ բարձրացնելու, այլ մի համակարգի մասին է, որը հիմնված է կոնկրետ թիրախային ցուցանիշների հասնելու վրա: Նա բացատրել է, որ այդ համակարգը պիլոտային կարգով ներդրել են անցած տարվա սկզբից։
«Այսինքն, անցած տարվա սկզբից սահմանվեցին թիրախային նպատակներ տարբեր գերատեսչությունների համար, և հետո տարվա կեսում դրա վերաբերյալ եղավ գնահատման պրոցես, թե ինչքանով են դրանք կատարվել։ Այսինքն՝ ի՞նչ թիրախներ են սկզբից դրվել, և հետո ինչքանո՞վ են դրանք կատարվել։ Այս մոդելի շրջանակներում գերատեսչությունների համար նախապես սահմանվում են չափելի նպատակներ, դրանց իրականացման արդյունքների հիման վրա իրականացվում է գնահատում, որի հիման վրա իրականացվում է լրացուցիչ վարձատրություն»,- նշել է Հովհաննիսյանը։
Նա հավելել է, որ այդ վճարումները պաշտոնյաներին տրամադրվել է այդ գնահատման արդյունքում։ Միևնույն ժամանակ Հովհաննիսյանը դա «խիզախ» քայլ է համարել՝ նշելով, որ իշխանությունները թափանցիկ են գործում։
«Նախկինում ավելի հեշտ էր, օրինակ, մեկը գար, ինչ-որ մարդկանց փողը բաժաներ, և ոչ մեկն էլ պարգևավճար չստանար, ու շահարկման թեմա չդառնար։ Հիմա մենք գնացել ենք այն ճանապարհով, որ պետք է ամեն ինչ թափանցիկ լինի, հասկանալի լինի։ Կարծում եմ, որ մեր հանրությունը, եթե չասեմ՝ պետք է գոհ լինի, ապա պետք է չզայրանա։ Մենք հավելյալ 300 մլրդ հարկ ենք հավաքել, այդ հարկը հավաքվել է այն պատճառով, որ պետական պաշտոնյաները բիզնեսով չեն զբաղվում, բիզնես չեն հովանավորում, ազատություն է տրված տնտեսական գործունեություն իրականացնելու համար»,- ընդգծել է նախարարը։
Նա կարծում է, որ պետական բարձրաստիճան պաշտոնյաները, ովքեր բավականին լարված և սթրեսային աշխատանքով են զբաղված, առնվազն պետք է որոշակի սոցիալական խնդիրների մասին ամեն օր չմտածեն, որպեսզի կարողանան կենտրոնանալ իրենց աշխատանքի հանձնառության վրա։ Նախարարն ընդգծել է, որ պիլոտային բնույթ կրող համակարգը լրամշակվելու է։
Հովհաննիսյանի նախնական տվյալներով՝ Հայաստանում 2025 թվականին տնտեսական աճը կազմել է 5,5-ից 6%։ Նա հայտնել է, որ սակայն արդեն հունվար-նոյեմբերին գրանցվել է 8,3% տնտեսական ակտիվության աճ, գնաճը կազմել է մոտ 3-3,3%։ Հովհաննիսյանը հավելել է, որ եթե ավելի վաղ ենթադրվում էր, որ 2025 թվականի վերջին կառավարության պարտքը կգերազանցի ՀՆԱ-ի 50%-ը, ապա այժմ այն, ըստ հաշվարկների, կկազմի մոտ 48,7%-ը։
ԶԼՄ-ների տվյալներով՝ 2025 թվականի դեկտեմբերին նախարարներն ու նրանց տեղակալները ստացել են միլիոնավոր դրամների պարգևավճարներ։ Բացի այդ, Ազգային ժողովի յուրաքանչյուր պատգամավորի փոխանցվել է 3 մլն դրամ։ Հունվարին արդարադատության նախարար Սրբուհի Գալյանը հաստատել էր, որ ստացել է 6-7 մլն դրամի պարգևավճար։ Վարչապետ Նիկոլ Փաշինյանը հունվարի 15-ին հայտարարել էր, որ իր ամսական վարձատրության ավելացումը կազմել է մոտ 1,5 մլն դրամ։
