ՀՀ արտաքին գործերի նախարար Արարատ Միրզոյանը մեկնաբանել է TRIPP նախագծի կառավարիչ ընկերությունում բաժնեմասերի բաշխվածությունը՝ պարզաբանելով, թե ինչու է ԱՄՆ-ին տրվել վերահսկիչ փաթեթ:
Միրզոյանը նշել է, որ TRIPP նախագծում բաժնեմասերի բաշխումը բանակցությունների արդյունք է և արտացոլում է կողմերի ներդրումների ծավալը։ Նրա խոսքով՝ այն, որ ընկերության 26%-ը պատկանելու է Հայաստանին, իսկ 74%-ը՝ ԱՄՆ-ին, համապատասխանում է կողմերի ներդրումային դերակատարմանը։
Միրզոյանն ընդգծել է, որ Միացյալ Նահանգներն ստանձնում է ներդրումային մեծ պարտավորություններ. խոսքը ոչ միայն քաղաքական աջակցության կամ քաղաքական կապիտալի, այլ ուղղակի ֆինանսական ներդրումների մասին է։
Հայաստանի ավանդը, ըստ նախարարի, մեծ հաշվով կայանում է կառուցապատման իրավունքի տրամադրման և ենթակառուցվածքների օգտագործման մեջ։
Նախարարը նաև հիշեցրել է, որ բաժնեմասերի ներկայիս հարաբերակցությունը նախատեսված է առաջիկա 49 տարվա համար և կապված է նախագծի բիզնես մոդելի ու ներդրումների վերադարձելիության ժամկետների հետ։ Ըստ նրա՝ երբ պայմանագիրը երկարաձգվի ևս 50 տարով, բաժնեմասերի համամասնությունը կփոխվի և կդառնա գրեթե հավասար․ Հայաստանը կստանա 49% բաժնեմաս։
Նախարարը հույս է հայտնել, որ այս տարվա ամառվա վերջին-աշնան սկզբին ենթակառուցվածքների շինարարությունը կմեկնարկի։
TRIPP-ը և «Հյուսիս-հարավը» կձևավորեն «Խաղաղության խաչմերուկը»
Միրզոյանը պարզաբանել է, թե ինչպես է TRIPP նախագիծը հարաբերվելու «Հյուսիս-հարավ» ավտոճանապարհի հետ՝ նշելով, որ դրանք չեն խանգարելու միմյանց, այլ ընդհակառակը՝ ստեղծելու են սիներգիա։
«Մի կողմից «Հյուսիս-հարավը», մյուս կողմից՝ TRIPP-ի ենթակառուցվածքները, որոնք ենթադրում են արևելք-արևմուտք շարժ, միասին կազմելու են խաչմերուկ։ Սա հենց այն «Խաղաղության խաչմերուկն» է, որի տեսլականն ունենք և ներկայացրել ենք աշխարհին»,- ընդգծել է Միրզոյանը։
Թուրքիայի և Ռուսաստանի ներգրավվածությունը և ապաշրջափակումը
Անդրադառնալով TRIPP-ին Թուրքիայի հնարավոր մասնակցությանը՝ ԱԳ նախարարը հստակեցրել է մի քանի առանցքային կետ։
Նա նշել է, որ Թուրքիայի մասնակցությունը բուն TRIPP նախագծին չի քննարկվել։ Այն մնում է որպես Հայաստան-ԱՄՆ համատեղ բիզնես գործունեություն։
«Տրամաբանական է, որ Թուրքիան լինի տարածաշրջանի զարգացման մաս, քանի որ առանց այդ օղակի բեռները չեն կարող Հայաստանի տարածքով (TRIPP ենթակառուցվածքներով) անցնել Նախիջևան, այնուհետև Երասխով դուրս գալ Թուրքիա և Եվրոպա, բայց ոչ կոնկրետ TRIPP-ի մասով»,- պարզաբանել է նախարարը։
Նա հայտնել է, որ Թուրքիայի հետ ապաշրջափակման շուրջ խոսակցությունը վաղուց կա և բավականին կառուցողական է։ Նա հույս է հայտնել, որ մոտ ապագայում այս ուղղությամբ կլինեն շոշափելի քայլեր։
Միրզոյանը նշել է, որ Ռուսաստանը մասնակցություն ունի երկաթուղիներում, ըստ նրա՝ թեև TRIPP-ում՝ ոչ, բայց դրա շարունակության համար կապ ու համագործակցություն կարելի է ստեղծել նաև ՌԴ-ի հետ։
Օգոստոսի 8-ին Վաշինգտոնում Հայաստանի և Ադրբեջանի ղեկավարներն ԱՄՆ-ի միջնորդությամբ հռչակագիր էին ստորագրել, որով նաև նախատեսվում է ստեղծել TRIPP տրանսպորտային երթուղի: Կողմերը նաև նախաստորագրել էին խաղաղության համաձայնագրի նախագիծ, որն օգոստոսի 11-ին հրապարակվել էր ՀՀ ԱԳՆ-ի կողմից: Փաստաթղթի համաձայն՝ կողմերը միմյանց նկատմամբ տարածքային պահանջներ չունեն և հետագայում նման պահանջներ չեն առաջադրելու:
