ԱՄՆ նախագահ Դոնալդ Թրամփը հունվարի 13-ին իր վարչակազմի անդամների հետ խորհրդակցություն կանցկացնի, որի ընթացքում կքննարկվեն Իրանի նկատմամբ հնարավոր քայլերը, այդ թվում՝ ռազմական հարվածները, կիբերհարձակումները և նոր պատժամիջոցների կիրառումը, հայտնում է The Wall Street Journal-ը՝ հղում անելով իր աղբյուրներին։
Պարբերականի տվյալներով՝ հանդիպմանը հրավիրված են ԱՄՆ պետքարտուղար Մարկո Ռուբիոն, Պենտագոնի ղեկավար Փիթ Հեգսեթը և Միացյալ շտաբի պետերի կոմիտեի նախագահ, գեներալ Դեն Քեյնը։ Նրանք Թրամփին կներկայացնեն Իրանում շարունակվող անկարգություններին արձագանքելու տարբերակներ, այդ թվում՝ երկրի տարածքում գտնվող թիրախների դեմ հարվածներ հասցնելու սցենարներ։
Ինչպես նշում է կայքը, Պենտագոնն առայժմ չի տեղափոխել լրացուցիչ ուժեր Իրանի սահմանների մոտ՝ հնարավոր գործողություններին նախապատրաստվելու շրջանակում։
Ավելի վաղ Թրամփը հայտարարել էր, որ ԱՄՆ-ն պատրաստ է կոշտ հարված հասցնել Իրանին՝ խաղաղ ցուցարարների մահվան դեպքում։ ԱՄՆ նախագահը հայտարարել էր, որ ամերիկացի զինվորականներն Իրանում «շատ ուժգին տարբերակներ» են դիտարկում՝ երկրում ցույցերի ֆոնին։ Իրանի իշխանությունները հայտարարել են պատասխան հարվածների մասին ԱՄՆ-ի միջամտության դեպքում:
Իրանում բողոքի ցույցերը շարունակվում են դեկտեմբերի 28-ից: Ի սկզբանե դրանք պայմանավորված էին տնտեսական ծանր իրավիճակով և ազգային արժույթի փոխարժեքի անկմամբ, բայց շուտով ձեռք են բերել նաև քաղաքական ենթատեքստ: Իրանագետ Տիգրան Դավուդյանը հունվարի 11-ին հայտնել էր Իրանում հայ ցուցարարի մահվան մասին։
