Կառավարությունը հաստատել է «Հայաստանի տնտեսական և ինստիտուցիոնալ վերափոխման դոկտրինը», որը, ըստ գործադիրի, նպատակ ունի ձևավորել երկրի երկարաժամկետ տնտեսական քաղաքականության միասնական տեսլականը և հաղթահարել գործող ռազմավարությունների հատվածայնությունը։
Փաստաթուղթը ներկայացվում է որպես «Հայաստան 2050» տեսլականի գաղափարական կամուրջ՝ անցում ապահովելով կարճաժամկետ քայլերից դեպի երկարաժամկետ ռազմավարական նպատակներ։ Դոկտրինում տնտեսությունը դիտարկվում է որպես պետական շահի և ազգային անվտանգության գործիք, իսկ կառավարման համակարգման պատասխանատվությունը դրվում է փոխվարչապետի գրասենյակի վրա։
Նախատեսվում է նաև միասնական թվային հարթակ՝ ռազմավարությունների իրականացման մոնիթորինգի, հանրային հետադարձ կապի և տվյալահենք կառավարման համար։ Դոկտրինի իրականացումը ենթակա է մշտադիտարկման․ այն կվերանայվի յուրաքանչյուր 3 տարին մեկ, իսկ կատարողականի և ռիսկերի վերաբերյալ հաշվետվությունները կլինեն եռամսյակային։
Դոկտրինն ամփոփում է նաև վերջին տարիների տնտեսական միտումները․ նշվում է, որ 2020-ին տնտեսությունը գրանցել է 7,2% անկում, իսկ 2018-2025թթ. ընթացքում՝ ավելի քան 50% իրական աճ։ Նախնական գնահատականով՝ մեկ շնչին ընկնող ՀՆԱ-ն 2025-ին հասել է 9,433 դոլարի, 2022-2024թթ. ՀՆԱ-ն միջինում աճել է 8,9%-ով, դրամն արժևորվել է շուրջ 20%-ով։
Ենթակառուցվածքների մասով նշվում է, որ 2018-2025թթ. ճանապարհաշինությանն ուղղվել է ավելի քան 593 մլրդ դրամ, արդիականացվել է շուրջ 4,736 կմ ճանապարհ։ «300 դպրոց» ծրագրով աշխատանքներ իրականացվել կամ իրականացվում են 357 դպրոցում՝ շուրջ 107 000 աշակերտի համար, իսկ ծրագրի բյուջեն կազմում է շուրջ 385 մլրդ դրամ։ «500 մանկապարտեզ» ծրագրի շրջանակում հատկացվել է ավելի քան 45 մլրդ դրամ՝ 504 մանկապարտեզի և նախակրթարանի կառուցման կամ հիմնանորոգման համար։
Փաստաթղթում անդրադարձ կա նաև կոռուպցիայի դեմ պայքարին․ նշվում է, որ 2018-ից մինչև 2025-ի առաջին կիսամյակը պետությանը և համայնքներին տարբեր մեխանիզմներով վերականգնված վնասը կազմել է ավելի քան 566 մլն դոլար կամ համարժեք գույք։ Դոկտրինով սահմանվում է նաև ներդրումների նախնական ուսումնասիրության (Investment Screening) մեխանիզմ, ինչպես նաև պետության որոշիչ դերակատարումը կրիտիկական ենթակառուցվածքների նկատմամբ՝ ըստ գործադիրի՝ առանց սեփականության իրավունքի խախտման։
ՀՀ վարչապետ Նիկոլ Փաշինյանը կառավարության նիստում նշել է, որ դոկտրինը պայմանավորված է տարածաշրջանային ու արտաքին քաղաքական այն նոր միջավայրով, որը ձևավորվում է Հայաստանի Հանրապետության շուրջ։
«Խաղաղության պայմաններում տնտեսությունը նույնպես պետք է վերափոխվի ու դիրքավորվի, ինչը հենց այս օրերին տեղի է ունենում մեր աչքի առաջ։ Հաստատված խաղաղությունն իր արտացոլումը պետք է ունենա նաև տնտեսության մեջ»,- հավելել է Փաշինյանը։
Նա շեշտել է, որ պետությունն իր վրա է վերցնում ակտիվ ու պատասխանատու դերակատարում՝ կենսական նշանակություն ունեցող ենթակառուցվածքներում։ Նա ընդգծել է, որ այդ թվում են նաև ջրային, էներգետիկ, թվային ու անվտանգային համակարգերը։ Պետությունը, նրա խոսքով, միաժամանակ ապահովելու է պետական սեփականության թափանցիկ ու տնտեսապես հիմնավորված մասնավորեցում այն ոլորտներում, որտեղ դա նպաստում է մրցակցությանն ու արդյունավետությանը։
«Այսինքն՝ այս դոկտրինով ավելի մեծ պատասխանատվություն ենք վերապահում կառավարությանը՝ կրիտակական կամ ռազմավարական նշանակության ենթակառուցվածքների կառավարման գործում։ Միևնույն ժամանակ, չենք բացառում, որ այնտեղ, որտեղ կարող են աշխատել մասնավոր կառավարման բանաձևերը, մենք մեզ չենք սահմանափակելու՝ գործելու նաև այդ տրամաբանությամբ»,- նշել է Փաշինյանը։
