ԱՄՆ նախագահ Դոնալդ Թրամփը կոչ է արել Ներկայացուցիչների պալատի հանրապետական օրենսդիրներին քվեարկել սեռական հանցագործության համար դատապարտված Ջեֆրի Էփշտեյնին գործի փաստաթղթերը հրապարակելու օգտին՝ փոխելով իր նախորդ դիրքորոշումը, հաղորդում է BBC-ն:
Նա շեշտել է, որ թաքցնելու ոչինչ չունեն: Սպասվում է, որ այս շաբաթ Ներկայացուցիչների պալատում կանցկացվի քվեարկություն՝ օրենքի նախագծի շուրջ, որը պարտավորեցնելու է Արդարադատության նախարարությանը հրապարակել այդ փաստաթղթերը։ Օրինագծի կողմնակիցներն արդեն գրեթե բավարար ձայներ ունեն՝ այն Պալատով անցկացնելու համար, սակայն անհայտ է, թե արդյոք այն կանցնի՞ Սենատում։ Եթե նախագիծը հաստատվի երկու պալատում, ապա Թրամփը նույնպես պետք է ստորագրի փաստաթղթերի հրապարակումը։
«Արդարադատության նախարարությունն արդեն տասնյակ հազարավոր էջեր հրապարակել է Էփշթեյնի մասին, ուսումնասիրում է տարբեր դեմոկրատ գործիչների (Բիլ Քլինթոն, Ռիդ Հոֆման, Լարի Սամերս և այլն) կապերը նրա հետ, և Ներկայացուցիչների պալատի վերահսկողական հանձնաժողովը կարող է ստանալ այն, ինչին իրավականորեն իրավունք ունի»,- նշել է Թրամփը:
Թրամփի կողմից Քլինթոնին հիշատակելը հաջորդում է ԱՄՆ արդարադատության նախարարության հայտարարությանը, թե այն կուսումնասիրի սեռական հանցագործի ենթադրյալ կապերը խոշոր բանկերի և մի շարք հայտնի դեմոկրատների հետ։ Քլինթոնը կտրականապես հերքել է, որ որևիցե բան է իմացել Էփշթեյնի հանցագործությունների մասին։
Ներկայացուցիչների պալատի վերահսկողական հանձնաժողովի դեմոկրատները հրապարակել էին երեք էլփոստային հաղորդագրություն՝ Էփշթեյնի և նրա երկարամյա գործընկեր Գիսլեն Մաքսվելի միջև, որը ներկայումս 20 տարվա ազատազրկման է դատապարտված երեխաների սեռական շահագործման համար։ Այդ նամակագրություններից որոշները հիշատակում էին նաև Թրամփին։
ԱՄՆ Կոնգրեսի դեմոկրատները նոյեմբերի 1-ին կոչ էին արել, որ Էնդրյու Մաունթբեթեն-Ուինձորը (նախկինում Մեծ Բրիտանիայի արքայազն Էնդրյուն-խմբ.) պատասխան տա հարցերին՝ կապված Էփշտեյնի գործի հետ։ Էփշտեյնը մահացել էր բանտում 2019 թվականին՝ մինչ իր դատավարությունը՝ մարդու առևտրի մեղադրանքով։
