Երևանի Հանրապետության հրապարակից կայացել է ջահերով երթը դեպի Ծիծեռնակաբերդի հուշահամալիր՝ ի հիշատակ 1915-1923 թվականներին Օսմանյան կայսրությունում հայերի դեմ իրականացված ցեղասպանության անմեղ զոհերի։
Մարդկության դեմ հանցագործության 111-ամյա տարելիցի նախօրեին ամեն տարի հազարավոր մարդիկ ջահերով քայլում են դեպի հուշահամալիր՝ որպես արդարադատության պահանջի արտահայտություն։ Դա թուրքական կառավարության դեմ ուղղակի բողոք է առ այն, որ հայ ժողովրդի դիմադրությունն ավելի քան մեկ դար ու մեկ տասնամյակ չի մարել։
Միջոցառումը կազմակերպած ՀՅԴ կուսակցության երիտասարդական թևի ներկայացուցիչներն ավանդաբար այրում են Թուրքիայի ու Ադրբեջանի դրոշները՝ վանկարկելով «Պայ-քա՛ր, պայ-քա՛ր»։ Այս տարի Հանրապետության հրապարակում այրվել է միայն Թուրքիայի դրոշը։
Ջահերով երթի համահայկական ակցիան ավանդաբար առաջնորդում են հոգևորականները, որոնք տանում են քրիստոնեության խորհրդանիշ խաչը։ Այս օրը շատ քաղաքացիներ մոմեր են դնում իրենց պատուհանների մոտ՝ լուսավորելով երթի ուղին և խորհրդանշական կերպով միանալով ակցիային։
Ամբողջ երթուղու երկայնքով լսվում են արդարություն պահանջող կարգախոսներ, սակայն Ծիծեռնակաբերդ բարձրանալու ընթացքում երթի մասնակիցները պահպանում են լիակատար լռություն։ Երթում կարևոր տեղ է զբաղեցնում հիսուն մետր երկարությամբ հսկայական եռագույն դրոշը։ Երթի մասնակիցները տանում էին Հայաստանի և Արցախի դրոշները։
Ճանապարհին կամուրջներից մեկի վրա կախել էին պաստառ, որի վրա պատկերված էր Արցախի խորհրդանիշներից մեկը՝ «Մենք ենք մեր սարերը» հուշարձանը և «Մենք կվերադառնանք» գրություն։
Երթն ավարտվել է Ցեղասպանության հուշահամալիրում, որտեղ մասնակիցները ծաղիկներ են խոնարհել անմար կրակի մոտ։ Հայկազուն արքեպիսկոպոս Նաջարյանը տերունական աղոթղ է հղել և ընթերցել Ամենայն հայոց կաթողիկոս Գարեգին Բ-ի օրհնության խոսքը։
Նշենք, որ 110-ամյակին ՀՀ վարչապետ Նիկոլ Փաշինյանը դատապարտել էր ապրիլի 23-ին Երևանում տեղի ունեցած ջահերով երթի մասնակիցների կողմից Թուրքիայի և Ադրբեջանի դրոշներն այրելու գործելակերպը։
Ապրիլի 24-ին լրանում է Օսմանյան կայսրության կողմից 1915 թվականին հայերի նկատմամբ իրականացված Ցեղասպանության 111-րդ տարելիցը։ Աշխարհասփյուռ հայությունը ոգեկոչման միջոցառումներով կհիշի 1,5 միլիոն անմեղ զոհերի հիշատակը։ Հայոց ցեղասպանությունը պաշտոնապես ճանաչել է 34 պետություն, ավելի քան 70 կազմակերպություն։ 111 տարի անց Թուրքիան շարունակում է ժխտել Մեծ եղեռնի իրողությունը և պայքարում է Ցեղասպանության միջազգային ճանաչման դեմ՝ նենգափոխելով պատմությունը։
Ստամբուլի իշխանությունները ինչպես հաճախ, այս տարի ևս մերժել են Հայոց ցեղասպանության զոհերի հիշատակին նվիրված միջոցառման անցկացման թույլտվությունը:
Կարդացեք նաև`
Ականատեսների հուշեր և փաստեր. Հայոց ցեղասպանության մասին գրքերի ընտրանի
Ուրուգվայից մինչև ԱՄՆ. Հայոց ցեղասպանության ճանաչման ուղին
