Նախագահական նստավայրի մոտ այսօր՝ փետրվարի 3-ին, տեղի է ունեցել ակցիա, որով ՀՀ նախագահ Վահագն Խաչատուրյանից պահանջել են հրապարակային ներողություն խնդրել Ադրբեջանի նախագահ Իլհամ Ալիևին շնորհակալություն հայտնելու համար։
Խաչատուրյանը հունվարին՝ Դավոսի համաշխարհային տնտեսական ֆորումի շրջանակում պանելային քննարկմանը, անդրադարձել էր Հայաստանի և Ադրբեջանի միջև խաղաղության գործընթացին և ասել. «Ուզում եմ շնորհակալություն հայտնել պարոն Ալիևին, նաև մեր վարչապետին՝ այն քաղաքական կամքի համար, որ դրսևորվել է»:
Ակցիայի մասնակիցները, որոնց թվում էին հասարակական կառույցների ներկայացուցիչներ, նաև զոհված զինծառայողների ծնողներ, ներողության պահանջով նամակ են հանձնել նախագահականի դիմումների և բողոքների բաժին։ Նրանք նախագահական էին եկել Խաչատուրյանին ուղղված պաստառներով, որոնց վրա գրված էր՝ «մեր ցավը քո դիվանագիտությունը չէ», «ցավի համար շնորհակալություն չեն ասում, ամո՛թ է», «Դավոսում շնորհակալություն, իսկ «Եռաբլուրում»՝ պատասխան»։
Ակցիայի մասնակից, «Համահայկական ճակատ» շարժման անդամ, «Հայկանդուխտ ավանդապաշտ ժողովրդավարական» կուսակցության փոխնախագահ Ռուզաննա Ստեփանյանի խոսքով՝ զոհերի, գերիների, անհետ կորածների, 120 հազար բռնի տեղահանված արցախցիների խնդիրը չի կարող շնորհակալության առարկա լինել։
«Հիմա հարց եմ ուղղում ձեզ, Խաչատուրյա՛ն, քանի՞ անգամ եք Ձեր այս շքեղ կեցավայրում ընդունել օր ու գիշերը կորցրած հարյուրավոր անհետ կորածների ընտանիքների մայրերին, քույրերին, երեխաներին։ Քանի՞ անգամ եք մտել պատերազմում զոհեր տված ընտանիքների տուն ու հարցրել՝ ինչպե՞ս եք ապրում, ապրո՞ւմ եք, թե՞ չեք ապրում։ Քանի՞ անգամ եք 120 հազար արցախցուց որևէ մեկին ընդունել Ձեր կեցավայրում»,- ասել է Ստեփանյանը։
Նա նշել է, որ Խաչատուրյանն իր այս հայտարարությամբ վիրավորել է 120 000 արցախցիներին, հազարավոր զոհված զինվորներին, մայրերին, քույրերին, սիրած աղջիկներին, երեխաներին։
«Խաչատուրյանը բարոյականության անթույլատրելի սահման է անցել։ Խաչատուրյանը վիրավորել է մեր գերիների ընտանիքներին, վիրավորել է հարյուրավոր անհետ կորածների ընտանիքներին։ Խաչատուրյա՛ն, Ձեզ հիմա հրավիրում եմ «Եռաբլուր» առանց դիպուկահարների, առանց շքերթի, առանց դիմակահանդեսի, առանց անվտանգության։ Եկեք, տղավարի կանգնեք, նայեք այդ ծնողների աչքերի մեջ ու ասեք, թե Դուք ինչո՞ւ եք շնորհակալություն հայտնում Ալիևին։ Խաչատուրյա՛ն, արյան հոտը դեռ գալիս է»,- շեշտել է նա։
2022 թվականի պատերազմում զոհված Ռոբերտ Գևորգյանի մայրը լրագրողներին ասել է, որ Խաչատուրյանի՝ Ալիևին ուղղված շնորհակալությունն իրեն ցավ է պատճառել։
«Ես ուղղակի շատ մեծ ցավ եմ ապրում այստեղ գտնվելով։ Երբ լսեցի իր շնորհակալությունները, վերքիս վրա, անկեղծ ասած, աղ լցվեց։ Ինչի՞ համար, որ «Եռաբլուրը» գնալով մեծացավ, հա՞։ Որևէ օր Ձեզ չեն հետաքրքրել՝ ի՞նչ օրով ենք մենք ապրում, երբ որ, օրինակ, դեկտեմբերի 31-ին բոլորդ նստած էիք ճոխ սեղանների առաջ, Նոր տարի էիք դիմավորում, իսկ մենք սառը քարերը գրկած՝ «Եռաբլուրում» ողբում էինք։ Խելքի եկեք, ամո՛թ է»,- նշել է նա։
Ակցիայի մասնակիցներին նախագահականից նամակը հանձնելուց տեղեկացրել են, որ չկա ընթակարգ, որով նախագահը կարող է իջնել և լսել իրենց բողոքը։ Նախագահականից նշել են, որ քաղաքացիներն իրենց բողոքը գրավոր ձևակերպեն։ Այլ նամակ, սակայն, ակցիայի մասնակիցները չեն պատրաստվում գրել։ Նրանք հայտնել են, որ ակցիայից հետո պատրաստվում են գնալ «Եռաբլուր» և պաշտոնյաների փոխարեն ներողություն խնդրել նահատակներից։
