Բաքուն ձգտում է ներգրավել Եվրոպական միությանը (ԵՄ) այսպես կոչված՝ «Զանգեզուրի միջանցք» նախագծում, այդ թվում՝ «Գլոբալ դարպաս» նախաձեռնության միջոցով, EU Today-ին տված հարցազրույցում հայտարարել է Ադրբեջանի արտաքին քաղաքականության խորհրդական Հիքմեթ Հաջիևը։
Նա նաև նշել է, որ Ադրբեջանը ԵՄ-ն համարում է ողջունելի գործընկեր նոր տրանսպորտային հանգույցում։
Հաջիևն ընդգծել է, որ «Զանգեզուրի միջանցքով» տարեկան նախատեսվում է տեղափոխել մոտ 15 միլիոն տոննա բեռ։ Նա նշել է, որ երթուղու ադրբեջանական հատվածի շինարարությունը կավարտվի մինչև 2026 թվականը։
Օգոստոսի 8-ին Վաշինգտոնում Հայաստանի և Ադրբեջանի ղեկավարներն ԱՄՆ-ի միջնորդությամբ հռչակագիր էին ստորագրել, որով նաև նախատեսվում է ստեղծել TRIPP («Միջազգային խաղաղության և բարգավաճման համար Թրամփի ուղի»-խմբ.) տրանսպորտային երթուղի:
ՄԱԿ-ի Գլխավոր ասամբլեայում ելույթ ունենալով՝ ՀՀ վարչապետ Նիկոլ Փաշինյանը սեպտեմբերին կոչ էր արել Ադրբեջանի նախագահ Իլհամ Ալիևին պարզաբանել «Զանգեզուրի միջանցքի» վերաբերյալ իր հայտարարությունները։ Ալիևը, նույն ամբիոնից ելույթ ունենալով, հայտարարել էր, որ TRIPP-ը կապահովի «անարգել անցում» «Զանգեզուրի միջանցքով»։
Հոկտեմբերի 1-ին Փաշինյանը հայտարարել էր, որ «Զանգեզուրի միջանցքը» որևէ կապ չունի Հայաստանի հետ, և նախագիծը վերաբերում է Հորադիզ-Զանգիլան ճանապարհին, որը գտնվում է Ադրբեջանի տարածքում։
