Վարչական դատարանը բավարարել է Հայաստանյայց Առաքելական սուրբ եկեղեցու հայցն Արագածոտնի մարզի Հովհաննավանքի գործով՝ ընդդեմ ՆԳՆ ոստիկանության, հայտնել է փաստաբան Արա Զոհրաբյանը։
Զոհրաբյանը նշել է, որ վճռով դատարանը ոչ իրավաչափ է ճանաչել ոստիկանության անգործությունը: Նա հիշեցրել է, որ գործը վերաբերում էր կարգալույծ հռչակված Ստեփան Ասատրյանի կողմից եկեղեցու Սուրբ Խորան, Ավանդատուն և Ատյան մուտք գործելու և ծիսական գործողություններ իրականացնելու վտանգի մասին։
Եկեղեցին նախապես դիմել էր ոստիկանությանը՝ պահանջելով ՀՀ կառավարության թիվ 797-Ն որոշմամբ նախատեսված կարգով կանխել ներխուժումը և իրականացնել վտարման գործողություններ։
Ոստիկանությունը հրաժարվել էր կատարել օրենքով սահմանված գործողությունները՝ նույնիսկ չներկայանալով դեպքի վայր և չիրականացնելով կառավարության որոշմամբ նախատեսված ստուգողական միջոցառումներ։
Դատարանը հստակ արձանագրել է, որ ոստիկանությունը պարտավոր էր ոչ թե անտեսել Մայր Աթոռի դիմումները, այլ օրենքով սահմանված կարգով ժամանել դեպքի վայր, ուսումնասիրել ներկայացված փաստաթղթերը և կատարել այն գործողությունները, որոնք նախատեսված են սեփականության իրավունքի պաշտպանության համար։
Ըստ փաստաբանի՝ վճռի կարևորագույն իրավական հետևությունն այն է, որ թեև եկեղեցին բաց է հավատացյալների համար, սակայն դրա բոլոր հատվածները չունեն նույն իրավական կարգավիճակը։ Խորանը, ատյանը և ավանդատունը բացառապես եկեղեցական ծառայության համար նախատեսված տարածքներ են:
Ըստ վարչական դատարանի՝ սահմանադրությամբ և օրենքով եկեղեցու ներքին կազմակերպման, եկեղեցական ծառայության իրականացման, ինչպես նաև եկեղեցու պաշտամունքային տարածքների օգտագործման կարգի սահմանումն ու դրանցում գտնվելու իրավասություն ունեցող անձանց շրջանակի որոշումը վերապահված է բացառապես եկեղեցու իրավասու մարմիններին:
Հունիսի 19-ին վարչական դատարանը ոչ իրավաչափ էր ճանաչել նաև Թալինի Սուրբ Աստվածածին եկեղեցու գործով ոստիկանության անգործությունը։
Փետրվարին դատարանը եկեղեցուն պարտավորեցրել էր ապահովել կարգալույծ քահանաներ Արամայիս Թախմազյանի (նախկինում Տեր Թադե-խմբ․) և Հովհաննավանքի նախկին հոգևոր հովիվ Ասատրյանի (նախկինում Տեր Արամ-խմբ․) պաշտոնավարումը՝ որպես հոգևոր հովիվներ։
Ասատրյանը և Թախմազյանը 2025-ին միացել էին Ամենայն Հայոց կաթողիկոս Գարեգին Բ-ի և եկեղեցու դեմ գործընթացներին, ինչից հետո վեհափառի կողմից կարգալույծ էին հռչակվել։ Նրանք, սակայն, չեն ընդունում այդ կարգավիճակը՝ շարունակելով ծեսեր մատուցել, որոնց երբեմն ներկա էր գտնվում նաև ՀՀ վարչապետ Նիկոլ Փաշինյանը։
