Վենեսուելայում երկրաշարժի զոհերի թիվը հասել է 2295-ի, հայտարարել է Վենեսուելայի ազգային ժողովի նախագահ Խորխե Ռոդրիգեսը, փոխանցում է «ՌԻԱ Նովոստին»։
«Այսօրվա դրությամբ՝ կա 2295 զոհ և 11267 վիրավոր»,- ասել է նա VTV-ի կողմից հեռարձակված ճեպազրույցի ժամանակ։
Վենեսուելայի նախագահի պարտականությունները կատարող Դելսի Ռոդրիգեսը հուլիսի 1-7-ը հայտարարել է յոթօրյա ազգային սուգ։ Նա նշել է, որ Վենեսուելան խորապես սգում է ավերիչ երկրաշարժերի հետևանքով զոհերի համար, ցավակցություն հայտնել զոհերի ընտանիքներին, վիրավորներին մաղթել արագ ապաքինում և աջակցություն հայտնել անհետ կորածների ընտանիքներին և տուժած համայնքներին։
Անօթևան մնացած մարդկանց թիվը հասել է 12 841-ի։ Ընդհանուր առմամբ՝ բնական աղետի հետևանքներից տուժել է 26 403 մարդ՝ ֆիզիկական և հոգեբանական վնասվածքներ, ինչպես նաև իրենց տների կորուստ կամ լուրջ վնաս։
Իշխանություններն արագացրել են տուժածների տեղավորումը Կարակասում և Լա Գուայրա նահանգում գտնվող ժամանակավոր ճամբարներում։ Նրանք տեղադրում են ցնցուղներ, մահճակալներ և ներքնակներ, ինչպես նաև տրամադրում են բժշկական օգնություն, հոգեբանական աջակցություն, սնունդ և խմելու ջուր։
Վենեսուելայում հունիսի 24-ին տեղի էր ունեցել 7,2 և 7,5 մագնիտուդով երկու երկրաշարժ։ Առավել շատ տուժել են Կարակասի մերձակա շրջաններն ու Լա Գուայրայի նահանգը։ Կիլիկիո կաթողիկոսությունը հայտնել էր երկրաշարժից տուժած հայերի մասին։
