Հունվարի 27-ից փետրվարի 2-ն առողջության առաջնային պահպանման կազմակերպություններ թոքաբորբով դիմել է 1022 պացիենտ, հոսպիտալացվել է 578-ը, որոնց 67,4%-ն անչափահաս է, հայտնում է Հիվանդությունների վերահսկման և կանխարգելման ազգային կենտրոնը։
Ըստ գերատեսչության՝ նախորդ շաբաթվա 584 հոսպիտալացումների համեմատ ցուցանիշը գրեթե նույնն է։ Ընդհանուր դեպքերի 67.9%-ը կազմում են 0-18 տարեկանները։
ՀՎԿԱԿ-ն հայտնում է, որ ՀՀ տարածքում շարունակվում է պահպանվել ՍՇՎ-ներով պայմանավորված ակտիվությունը:
«Նշված ժամանակահատվածում սուր շնչառական վարակներով դիմել է 9105 պացիենտ, (հիվանդացության ցուցանիշը կազմել է՝ 307,3) նախորդ շաբաթվա համեմատ հիվանդացությունը նվազել է՝ 1,1 անգամ, իսկ 2024թ. միևնույն ժամանակահատվածում արձանագրված դեպքերի համեմատ ցածր է 1,1 անգամ։ Ընդհանուր դեպքերի 74,7%-ն արձանագրվել է 0-18 տարեկանների շրջանում»,- ասվում է հաղորդագրությունում։
Նշվում է, որ ՀՀ բժշկական օգնություն և սպասարկում իրականացնող կազմակերպություններում ՍՇՎ-ներով հոսպիտալացվել է 863 պացիենտ, որոնց 92,8%-ը կազմում են 0-18 տարեկանները։ Նախորդ շաբաթվա 932-ի համեմատ՝ հոսպիատալացումները նվազել են 1,1 անգամ։
Ըստ ՀՎԿԱԿ-ի՝ լաբորատոր հետազոտությունների արդյունքում մետապնևմավիրուս չի հայտնաբերվել:
Հունվարի 14-ին ՀՀ առողջապահության նախարար Անահիտ Ավանեսյանը հայտարարել էր, որ Հայաստանում սուր շնչառական հիվանդությունների տարածման հետ կապված իրավիճակը կառավարելի է։
