Վերջին շրջանում Հայաստանում հաճախակիացել են հրազենային կրակոցներով և դանակահարություններով ուղեկցվող դեպքերը։ Որոշ միջադեպեր ավարտվել են զոհերով ու վիրավորներով՝ առաջացնելով քաղաքացիների անհանգստությունը։
Փետրվարի 18-ին Աջափնյակ վարչական շրջանում հնչած կրակոցների հետևանքով արձանագրվել էր զոհ։ Փետրվարի 21-ին Գեղարքունիքի մարզում տեղի ունեցած դանակահարության հետևանքով մահացել էր 20-ամյա երիտասարդ։
Փետրվարի 22-ին Հաղթանակ կամրջի տակ հայտնաբերվել էր նախկին կայազորի դատախազ Տիգրան Սուքիասյանի դին։ Դեպքի առնչությամբ իրականացվում են քննչական գործողություններ՝ տեղի ունեցածի բնույթը պարզելու նպատակով։
Ավելի վաղ՝ հունվարի 14-ին, Աբովյան 25 հասցեում տեղի ունեցած դանակահարության հետևանքով երեք անձ, որոնցից երկուսը՝ անչափահաս, տեղափոխվել էին բժշկական հաստատություններ։
Armenia Today-ը քաղաքացիներից հետաքրքրվել է, թե որքանով են մտահոգված են այս իրավիճակով պայմանավորված։
Նրանք մեծ մասը նշել է, որ սա մտահոգիչ է:
«Ես երկրի քաղաքացի եմ, ո՞նց կարող է չհուզի», - ասել է քաղաքացիներից մեկը:
Հարցին՝ թե ի՞նչն է այս ամենի պատճառը, տարբեր տեսակետներ են հնչել:
«Դեմն առնող չկա, ոստիկանությունը մի հոգու համար ա ստեղծված երևի», - նշել է մեկ այլ քաղաքացի:
Մյուսի կարծիքով էլ՝ օրենքը թույլ է:
«Մարդիկ իրար հետ լեզու չեն գտնում»,- կարծում են քաղաքացիները։
Թե ո՞ւմ պատասխանատվության տիրույթում են քաղաքացիները տեսնում հարցի կարգավորումը՝ այստեղ էլ պատասխանները միանշանակ չեն։
«Ոստիկանությունը պետք է դրանով զբաղվի, բայց զբաղվում է կառավարության, Նիկոլ Փաշինյանի և մյուսների պաշտպանությամբ», - ասել է հարցման մասնակիցներից մեկը:
Մյուսի խոսքով էլ. «Լավ էլ հսկում են, ոստիկանները լավ աշխատում են․ մարդկանց ուղեղը երևի կարելի է հետ բերել, չի կարելի ամեն դատարկ բանի համար դանակը վերցնել հարձակվել իրար վրա»:
Միաժամանակ, պաշտոնական վիճակագրությունը ցույց է տալիս, որ վերջին տարիներին սպանությունների թիվն աճել է։ 2024 թվականին Հայաստանում գրանցվել է 45 հաստատված դեպք, 2025-ին՝ 50: Ըստ Վիճակագրական կոմիտեի՝ 83%-ով վերջին 5 տարիների ընթացքում աճել է հրազենով հանցագործությունների թիվը: 2020-ին այդպիսի 83 դեպք էր գրանցվել, 2025-ին՝ 125։
Մանրամասները՝ տեսանյութում։
