«Քաղաքացիական պայմանագրի» ներկայացուցիչներն օգոստոսի 15-ին կուսակցության նիստում դժգոհել են էլեկտրաէներգիայի և ջրի անջատումների հաճախականությունից, գրել է «Հրապարակ»-ը՝ վկայակոչելով իր աղբյուրներին։
Կուսակցությունը քննարկում է ոչ միայն «Հայաստանի էլեկտրական ցանցեր», այլև «Վեոլիա ջուր» ընկերության դեմ գործողություններ, ասվում է հրապարակման մեջ։ Ըստ թերթի՝ կուսակցության որոշ ներկայացուցիչներ առաջարկներ են հնչեցրել ընկերության ակտիվները պետությանը փոխանցելու վերաբերյալ։
«Ներկաներից ոմանք կողմ են արտահայտվել մասնավորի կառավարմանը՝ կարծիք հայտնելով, որ հակառակ դեպքում կորուստներն ավելի մեծ կլինեն, և անգամ չենք ունենա այն, ինչ այսօր ունենք»,- նշել է հրատարակությունը։
Քննարկումը չի հասել «տրամաբանական» ավարտին, և միասնական տեսակետ չի ձևավորվել։ Լրատվականը նշել է, որ վարչապետ Նիկոլ Փաշինյանը ձեռնպահ է մնացել կարծիք հայտնելուց:
ՏԿԵ նախարար Գնել Սանոսյանը պարզաբանել է, որ անջատումները պայմանավորված են արևային կայանների արտադրած էներգիայով, որը մտնում է ՀԷՑ, նոր բաշխվում, և երբեմն հոսանքի ավելցուկի պատճառով սարքերը չեն դիմանում, հոսանքազրկումներ են տեղի ունենում։
Օգոստոսի 24-ին ԶԼՄ-ն տեղեկացել էր «Քաղաքացիական պայմանագրի»՝ Էլեկտրական ցանցերի ազգայնացման ծրագրի մասին։ Օգոստոսի 22-ին ՀԾԿՀ նախագահ Գարեգին Բաղրամյանը նշել էր Արաբկիրում և Կենտրոնում հոսանքի անջատումների ավելացման պատճառը։
Հուլիսի 6-ին ՆԳՆ մամուլի քարտուղար Նարեկ Սարգսյանն Armenia Today-ին հայտնել էր, որ հրդեհ էր բռնկվել Հրազդանի կիրճում գտնվող Երևանի հիդրոէլեկտրակայանում։ Նա ասել էր, որ հրդեհի պատճառը մալուխի բռնկումն էր: ՀԷԿ-ում բռնկված հրդեհի պատճառով Երևանի մի մասը մնացել էր առանց էլեկտրականության։
Հուլիսի 9-ին ՀԷՑ-ը երևանցիներին նախազգուշացրել էր հիդրոէլեկտրակայանում բռնկված հրդեհից հետո հոսանքազրկումների մասին։ Ընկերությունը վստահեցրել էր, որ միջոցներ է ձեռնարկում խնդիրը հնարավորինս արագ կարգավորելու համար։ Հուլիսի 13-ին ՀԷՑ-ից Armenia Today-ին հայտնել էին, որ ընկերությունը նախատեսում է կարճ ժամկետներում ամբողջությամբ վերացնել «Երևանի ՀԷԿ 1»-ում տեղի ունեցած հրդեհի հետևանքները։
