«Հայաստան» խմբակցությունն առաջարկել է 2026 թվականի հունվարի 1-ից նվազագույն կենսաթոշակի չափը սահմանել պարենային զամբյուղի ամսական զամբյուղից ոչ պակաս, իսկ միջին աշխատանքային կենսաթոշակի չափը՝ սպառողական զամբյուղի ամսական արժեքից ոչ պակաս։
Հարցի զեկուցող պատգամավոր Արծվիկ Մինասյանն ասել է, որ «Պետական կենսաթոշակների մասին» օրենքում լրացումներ կատարելու մաuին» նախագծով առաջարկվել է սպառողական զամբյուղների էներգետիկ արժեքն ու կառուցվածքը սահմանելու իրավասություն վերապահել կառավարությանը։
Ընդ որում՝ հաշվարկի հիմքում պետք է դրվի նախորդ տարվա երրորդ եռամսյակի միջին ընթացիկ գներով հաշվարկված պարենային ու սպառողական զամբյուղների արժեքները։
«Քաջ հայտնի է, որ ՀՀ շուրջ 494 000 կենսաթոշակառուի թոշակների մակարդակն այսօր խիստ ցածր է, բնականաբար, անհրաժեշտություն կա հատկապես հիմա այս փոփոխությունն ընդունել»,- պարզաբանել է Մինասյանը։
Նա հիշեցրել է, որ կառավարությունը խոստացել է 2026 թվականից նվազագույն զամբյուղի և կենսաթոշակի միջին չափերը հավասարեցնել։ Միջոցառումների ծրագրով նույն ձևակերպումը տրված է, ու խոստումը վերաթարմացված, ասել է նա։
Մինասյանը հիմնավորել է, որ կառավարությունը վերցրել է համաշխարհային բանկի մեթոդաբանությամբ հաշվարկված նվազագույն զամբյուղների արժեքները և սահմանել, որ սպառողական զամբյուղի արժեքը 37 000 դրամ կլինի, իսկ մյուսը՝ 68 000 դրամ, այսինքն՝ միջին կենսաթոշակը 68 000 դրամից պակաս չպետք է լինի։
ԱԺ Աշխատանքի և սոցիալական հարցերի մշտական հանձնաժողովի նախագահ Հերիքնազ Տիգրանյանի խոսքով՝ թեև այս նախագիծը բերել է ընդդիմությունը, սակայն հարցն արդեն ՔՊ քաղաքական թիմի հանձնառությունն է, որն ստանձնել է 2021 թվականին։
«Անցած չորս տարիների ընթացքում կառավարությունը հետևողական էր, ինչի արդյունքում շուրջ 22%-ով ավելացել է կենսաթոշակի չափը։ Այս պահին մեր նվազագույն կենսաթոշակը մեկ շնչի հաշվով գերազանցում է պարենային զամբյուղի արժեքը»,- նշել է նա։
Տիգրանյանն ընդգծել է, որ հանձնաժողովն օրինագծին տվել է բացասական եզրակացություն, քանի որ ընդունված օրենքներում արդեն առաջարկվող դրույթները կան, հետևաբար, նա ԱԺ-ին կոչ է արել դեմ քվեարկել նախագծին։
«Ճիշտ է, 2025 թվականի բյուջեով չունենք նախատեսած կենսաթոշակի բարձրացում ուղիղ իմաստով, բայց ներդրված հետվճարի համակարգի շնորհիվ կենսաթոշակառուներն ստանում են 12% հետվճարի հնարավորություն։ Այս պահին նվազագույն կենսաթոշակը 36 000 դրամ է, նվազագույն պարենային զամբյուղը մեկ շնչին 33 000 դրամ է, սպառողական զամբյուղի արժեքը՝ 61 500 դրամ, իսկ միջին կենսաթոշակը՝ 51 000 դրամ»,- պարզաբանել է նա։
2024 թվականի հունվարի 10-ին հրավիրած մամուլի ասուլիսի ժամանակ ՀՀ աշխատանքի և սոցիալական հարցերի նախարար Նարեկ Մկրտչյանը՝ պատասխանելով Armenia Today-ի հարցին, ասել էր, որ հաջորդ կենսաթոշակի բարձրացումը նախատեսված է 2025 թվականին։
