ՀՀ զինված ուժերի գլխավոր շտաբի նախկին պետ Օնիկ Գասպարյանն առաջարկել է Ազգային ժողովում կազմակերպել փակ ձևաչափով քննարկում՝ 2020 թվականի պատերազմի և հետպատերազմական իրադարձությունների վերաբերյալ։ Նա առաջարկն արել է վերջին օրերին, իր խոսքով, պատերազմական և հետպատերազմական իրադարձությունների վերաբերյալ «կեղծ լուրերի» ֆոնին, ուր շահարկել են նաև իր անունը։
Նա առաջարկել է քննարկմանը ներգրավել այդ ժամանակահատվածում պաշտոնավարած քաղաքական և ռազմական առանցքային պաշտոններ զբաղեցրած անձանց։ Գասպարյանն անհրաժեշտ է համարել նաև պետական ու ծառայողական գաղտնիք պարունակող տվյալներին առնչվելու համապատասխան թույլտվություն ունեցող քաղաքական, հասարակական գործիչներին և զոհված ու անհետ կորած զինծառայողների հարազատների ներկայությունը։
«Ժամանակն է առերեսվել իրականության հետ և պայթեցնել շրջանառվող բոլոր ստերն ու անհարկի շահարկումները։ Պատրաստ եմ զինված ուժերին վերաբերելի մասով ներկայացնել մանրամասն և բազմակողմանի փաստարկված վերլուծություն»,- հայտարարել է նա։
Ապրիլի 2-ին վարչապետ Նիկոլ Փաշինյանը ճեպազրույցում գեներալներին վախկոտ էր անվանել՝ նշելով, որ 44-օրյա պատերազմում նրանցից մի քանիսը խուճապ են տարածել 44-օրյա պատերազմում։
Ապրիլի 17-ին, արձագանքելով Փաշինյանին, ԱԺ «Հայաստան» խմբակցության ղեկավար Սեյրան Օհանյանը նշել էր, որ Գլխավոր շտաբն է այդ ժամանակ որոշումներ ընդունել և, ըստ դրա, «Փաշինյանի և ԳՇ-ի հաստատած պատասխանատվության գոտով են ադրբեջանցիները շրջանցումներ կատարել ու հասել Շուշի, Բերդաձոր և ՀՀ սահմաններ»։
44-օրյա պատերազմի ժամանակ Գասպարյանը ԳՇ պետն էր, պաշտոնից ազատվել էր 2021-ին։
