Հայ Առաքելական եկեղեցու (ՀԱԵ) Ռուսաստանի և Նոր Նախիջևանի թեմը դատապարտել է իշխանությունների «հակաեկեղեցական արշավը» և որոշ եկեղեցականների որդեգրած «կանոնազանց և պառակտիչ մոտեցումները»։
Հայտարարության մեջ ընդգծվել են այն մոտեցումները, որոնք ՀԱԵ Ռուսաստանի թեմի ներկայացուցիչները դատապարտում են. ձեռնադրությամբ կամավոր ստանձնած ուխտադրության դավաճանությունը, ուղիղ վարդապետությունից շեղումը, Սուրբ պատարագի խորհրդի կամայական աղճատումը, փաստացի հրաժարումը օրինավոր, ազգընտիր հայրապետին ընդունելուց, Հայաստան և Արցախ աշխարհների համար աղոթքից։
«Մենք՝ Տիրախնամ թեմի հոգևոր սպասավորներս, մեր որդիական խոնարհումն ենք բերում և հայտնում անսակարկ հավատարմությունն ու նվիրումը Մայր Աթոռ Սուրբ Էջմիածնին, եկեղեցական կանոնակարգին և ազգընտիր գահակալ Ամենայն Հայոց կաթողիկոս Գարեգին Երկրորդին՝ անշեղորեն իրականացնելու հոգեխնամ մեր առաքելությունը հայ հոգևոր և ազգային անդաստանում»,- ասված է հայտարարության մեջ։
Դատապարտող հայտարարությանը միացել են թեմի բոլոր քահանաները, բացառությամբ քահանա Հակոբ Սարոյանի, ով News.am-ի տեղեկություններով՝ եպիսկոպոս Գևորգ Սարոյանի եղբայրն է, որը նոյեմբերի 27-ին մասնակցել էր վարչապետ Նիկոլ Փաշինյանի հետ հանդիպմանը։
Հոգևորականներն ընդգծել են, որ Հայաստանի սահմանադրության 17-րդ հոդվածի 2-րդ և 18-րդ հոդվածի 2-րդ կետերը խախտած, երկրի օրենսդրությունը ոտնահարած իշխանությունների հետ գաղտնի գործարքների մեջ մտնելը և իշխանության կողմից միջամտությունը եկեղեցական ներքին կանոնակարգին օրինականացնելը ևս չի կարող ընդունելի համարվել։ Թեմը կոչ է արել հավատարիմ մնալ Մայր եկեղեցու միասնականությանը և հոգևոր ուխտին։
Փաշինյանի կազմակերպած հանդիպմանը մասնակցել էին եպիսկոպոսներ, որոնք, ըստ իշխանական լրատվամիջոցների, ստորագրել էին Մայր Աթոռի դիվանապետին դատապարտող հայտարարություն: Մասնավորապես, հանդիպմանը ներկա էին արքեպիսկոպոսներ Նավասարդ Կճոյանը, Աբրահամ Մկրտչյանը, Առաքել Քարամյանը, Վազգեն Միրզախանյանը, եպիկոպոսներ Անուշավան Ժամկոչյանը, Վրթանես Աբրահամյանը, Առաքել Տիգրանյանը, Սարոյանը։ Նրանք նոյեմբերի 29-ին կոչ էին արել կաթողիկոսին «հանգստյան կոչվել» և նոր ընտրություններ կազմակերպել։
