«Մեր ձևով» շարժման անդամ Շիրազ Մանուկյանը Գառնահովիտ գյուղի օրինակով ներկայացրել է, թե ինչպես կարելի է լուծել տեղում աշխատատեղերի խնդիրը:
Նրա փոխանցմամբ՝ ներկայում գյուղում ապրում է 43 ընտանիք, կա ընդամենը 12 դպրոցահասակ աշակերտ։ Նոր դպրոց կառուցելու համար պետությունը, ըստ Մանուկյանի, հատկացրել է շուրջ 696 միլիոն դրամ (մոտ 1,7 միլիոն դոլար)։
«Գյուղում աշխատանք չկա։ Երիտասարդներն ստիպված են մեկնել Երևան, Աշտարակ կամ այլ քաղաքներ՝ աշխատանք գտնելու նպատակով։ Նրանց մի մասը ժամանակի ընթացքում հաստատվել է հենց այդ քաղաքներում՝ թողնելով գյուղը։ Հիմնական հարցն այն է, թե արդյոք այդ գումարով՝ 696 միլիոն դրամով, կարելի՞ էր հիմնել փոքր արտադրամասեր, մթերման կայաններ: Այդպիսով հնարավոր կլիներ ստեղծել աշխատատեղեր հենց տեղում՝ գյուղի բնակիչների համար»,- գրել է նա սոցիալական ցանցում։
«Մեր ձևով»-ի անդամը շեշտել է, որ Գառնահովիտում գործող հին դպրոցը հնարավոր էր պարզապես վերանորոգել և բարելավել անհրաժեշտ պայմանները՝ նկատելով, որ առանց աշխատանքի գյուղը դատարկվում է, իսկ նոր դպրոցը կարող է պարզապես դատարկ մնալ։
Շարժման համակարգող Նարեկ Կարապետյանը հոկտեմբերի 30-ին իշխանություններին մեղադրել էր սխալ առաջնահերթությունների մեջ՝ շեշտելով, որ դպրոցներ կառուցելուն զուգահեռ պետք է նաև աշխատատեղեր բացել:
Կարապետյանն օգոստոսի 4-ին առաջարկել էր Վանաձորում երկու արդյունաբերական նախագիծ իրականացնել՝ պարարտանյութերի արտադրության քիմիական գործարանի վերականգնում և քաղաքում նավթի վերամշակման կենտրոնի ստեղծում:
«Մեր ձևով»-ն առաջարկել էր նաև Մեղրիի զարգացման ծրագիր՝ շեշտը դնելով էներգետիկայի, լոգիստիկայի և բնակարանաշինության վրա։ Առաջարկել են նաև Գեղարքունիքի մարզի զարգացման նախագիծ՝ շեշտը դնելով Սևանում ձմեռային զբոսաշրջության և ձկնաբուծության վրա, ինչպես նաև Հայաստանի քաղաքներում ու գյուղերում գործազրկության կրճատման ծրագիր: Շարժումը տեղեկացրել էր Ալավերդու կենտրոնական զբոսայգու վերակառուցման ծրագրերի մասին:
