Վարչապետ Նիկոլ Փաշինյանը մեղադրանքների նոր ալիք է բարձրացրել Հայ Առաքելական եկեղեցու ղեկավարության հասցեին և հայտարարել, որ «կյանքը կդնի՝ եկեղեցին սեռական մոլագարներից ազատելու համար»։
«Եկեղեցու սպասավորը, ով ներսից գիտի, ասում է՝ ինչ-որ մեկը սեռական կողմնորոշում ունի, ինձ դեռ չի էլ հետաքրքրում ավանդական, ոչ ավանդական, որովհետև ի՞նչ է նշանակում՝ եպիսկոպոսի սեռական կյանք։ Եպիսկոպոսը սեռական կյանք չպիտի ունենա»,- ասել է նա։
Փաշինյանի խոսքով՝ հակառակը պնդող յուրաքանչյուր ոք Հայ Առաքելական եկեղեցու Ռուսաստանի և Նոր Նախիջևանի թեմի առաջնորդ, կաթողիկոս արքեպիսկոպոս Եզրաս Ներսիսյանի եղբոր «լրտեսական ցանցի անդամ» է։ Փաշինյանը պնդել է, որ հոգևորականներից մեկը «ԿԳԲ-ի գործակալ է, մեկը քահանաների հետևից է ընկնում, ձեռք է գցում»։
«Գարեգինն աղջիկ ունի՞, թե՞ չունի։ Այս հարցին պատասխանե՞լ է այդ մարդը»,- նաև հարցրել է կառավարության ղեկավարը։
Նա հավելել է, որ Էջմիածնի Մայր Աթոռում «մեկը բոսյակ է, մեկը՝ սեռական մոլագար»։
«Ես կյանքս կդնեմ դրանցից իմ սրբությունը, մեր սրբությունն ազատելու համար, եթե նույնիսկ մենակ մնամ, ես պրոբլեմ չունեմ, պետք է ամեն մեկը որոշում կայացնի»,- հայտարարել է նա։
Մայիսի 29-ից սկսած Փաշինյանը սոցիալական ցանցերում մի շարք գրառումներ էր արել Հայ Առաքելական եկեղեցու ներկայացուցիչների հասցեին, իսկ ավելի ուշ հանդես եկել նոր կաթողիկոս ընտրելու կոչով՝ կասկածի տակ դնելով նրա՝ կուսակրոնության ուխտի պահպանումը։
Մանրամասները՝ տեսանյութում։
