Հայաստան-Պորտուգալիա խաղի տոմսերը, որոնք նախապես ամրագրվել էին Հայաստանի ֆուտբոլի ֆեդերացիայի (ՀՖՖ) կողմից, «սև շուկայում» վաճառվել են բազմապատիկ թանկ գնով, հայտնում է «Հետքը»։
ՀՖՖ-ից լրատվամիջոցին տեղեկացրել են, որ հանդիպման համար ամրագրված էր շուրջ 4200 տոմս, որոնցից 1104-ը նախատեսված էր Պորտուգալիայի ֆուտբոլի ֆեդերացիայի և նրանց ֆան ակումբի համար։ 1130 տոմս ամրագրված էր FAF և Red Eagles ֆան շարժումների համար։
Մյուս տոմսերը՝ թվով 1966 հատ, ամրագրված էին սոցիալական տարբեր խմբերի (զինհաշմանդներ, մանկատներ), ՀՖՖ աշխատակազմի, «Հանրապետական» ստադիոնի և ՀՖՖ Տեխնիկական կենտրոն/ֆուտբոլի ակադեմիայի աշխատակիցների, Հայաստանի տարբեր տարիքային հավաքականների մարզչական շտաբերի, ՀՖՖ մրցավարների, պատվիրակների, հրահանգիչների, պրոֆեսիոնալ բոլոր ակումբների, ինչպես նաև ՀՖՖ գործընկերների համար։
«Հետքը» դիմել է մանկատներ և Զինծառայողների ապահովագրության ազգային հիմնադրամին պարզելու, թե արդյոք տրամադրվե՞լ են նրանց Հայաստան-Պորտուգալիա ֆուտբոլային խաղի տոմսեր։ Պարզվել է՝ ոչ։
ՀՖՖ-ի տոմսերի գնման կայքում՝ tickets.ffa.am-ում, տոմսերի սպառումից հաշված ժամեր անց դրանք հայտնվել են «սև շուկայում»։ Եթե ֆեդերացիան տոմսերը վաճառում էր 1000-20 000 դրամով, ապա վերավաճառողների մոտ դրանց գինը որոշ դեպքերում հատում էր 1 միլիոն դրամի շեմը։
Լրատվամիջոցը համեմատել է տոմսերի վերավաճառքով զբաղվող հարթակներում առկա տոմսերը ՀՖՖ-ի ամրագրած տոմսերի հետ և պարզել, որ դրանց մի մասը հետագայում հայտնվել է վերավաճառողների մոտ։
«Օրինակ՝ արևմտյան տրիբունայի սեկցիա 1 աեկտոր 4-ում բոլոր տեղերը նախապես ամրագրված էին ՀՖՖ-ի կողմից։ Սեպտեմբերի 1-ի դրությամբ՝ այդ նույն հատվածի տոմսերը վաճառվում էին viagogo.com կայքում։ Եթե ՀՖՖ-ի կայքում այդ հատվածի տոմսերի արժեքը 14-20 հազար դրամ էր, ապա վերը նշված կայքում՝ 624 000 դրամ։ Առկա էր երկու տեղ՝ կողք-կողքի։ Նույն պատկերն էր նաև արևելյան տրիբունայի սեկցիա 2 սեկտոր 6-ում։ ՀՖՖ-ի կայքում այդ հատվածի մեկ տոմսի արժեքը 14 000 դրամ էր, viagogo.com կայքում՝ 375 000»,- գրում է ԶԼՄ-ն։
ՀՖՖ-ից մեկնաբանել են, որ ֆեդերացիան ոչ միայն այս օրերին, այլ միշտ պայքարում է «սև շուկայում» տոմսերի վերավաճառքի դեմ։
«Այս ընթացքում ՀՖՖ-ի կողմից արգելափակվել են հարյուրավոր օտարեկրյա անձնագրերով, բայց նույն IP-ով օգտատերերի, որոնք փորձել են մուտք գործել tickets.ffa.am: 1 երկրպագուն Պորտուգալիայի դեմ խաղին հնարավորություն է ունցել գնել 2 տոմս։ Սա արվել է այն պատճառով, որ մեկ անձը չկարողանա գնել մի քանի տոմս և զբաղվել վերավաճառքով»,- հավելել են ՀՖՖ-ից։
ՀՖՖ-ն հայտնել էր, որ Հայաստան-Պորտուգալիա հանդիպման բոլոր տոմսերի QR կոդերն ակտիվանալու են խաղի օրը՝ սեպտեմբերի 6-ին, ժամը 16:00-ին։ ՆԳՆ ոստիկանությունն զգուշացրել էր, որ մինչ ֆուտբոլային հանդիպման օրը ցանկացած QR կոդ, որը ցույց կտան կամ կվաճառեն, կեղծ է։
Հանդիպումը կկայանա Վազգեն Սարգսյանի անվան «Հանրապետական» մարզադաշտում՝ ժամը 20։00-ին։ Խաղին կմասնակցի նաև պորտուգալական ֆուտբոլի լեգենդ Կրիշտիանու Ռոնալդուն։ Նա 2015 թվականի հունիսին Երևանում հեթ-տրիկ էր ձևակերպել՝ ՈՒԵՖԱ Եվրո 2016-ի որակավորման փուլում 3։2 հաշվով հաղթանակ բերելով Պորտուգալիային։
