«Սկսվում է ձեր նոր ճանապարհը»․ Սամվել Կարապետյանի շնորհավորանքը՝ Գիտելիքի և դպրության օրվա առթիվ

«Տաշիր» ընկերությունների խմբի նախագահ Սամվել Կարապետյանը դպրոցականներին, ուսանողներին, ինչպես նաև ուսուցիչներին ու կրթության ոլորտի ներկայացուցիչներին շնորհավորել է Գիտելիքի և դպրության օրվա կապակցությամբ։

«Ցանկանում ենք բոլորիդ լուսավոր ճանապարհ, բարձր առաջադիմություն և հաջողություններով լի ուսումնական տարի: Առանձնակի ջերմությամբ ուզում ենք մեր բարեմաղթանքները հղել բոլոր առաջին դասարանցիներին: Այսօր դուք առաջին անգամ ոտք եք դնում դպրոց, սկսվում է ձեր նոր և հետաքրքիր ճանապարհը դեպի գիտելիքների աշխարհ` դեպի մեծ ապագա: Փորձեք հնարավորինս արդյունավետ օգտագործել ձեր ժամանակը։ Բարի երթ»,- փոխանցել է Կարապետյանը։

Կալանքի տակ գտնվող գործարարի պաշտպանության խորհուրդը տեղեկացրել է, որ վերջին օրերի ընթացքում «Տաշիր» բարեգործական հիմնադրամը Կարապետյանի նախաձեռնությամբ իրականացրել է ավանդական դարձած «15 000 պայուսակ, 15 000 ժպիտ» ծրագիրը` դրական էմոցիաներ պարգևելով գյուղական համայնքների առաջին դասարանցիներին:

Հունիսին «Տաշիր» խմբի նախագահն աջակցել էր Հայ Առաքելական եկեղեցուն՝ հոգևորականների հասցեին իշխանությունների քննադատությունների ֆոնին։ Հունիսի 18-ին գործարարը երկու ամսով կալանավորվել էր՝ իբր իշխանությունը զավթելու կոչի մեղադրանքով:

Հուլիսի 4-ին Կարապետյանը հայտարարել էր, որ ՀՀ վարչապետ Նիկոլ Փաշինյանը և նրա կառավարությունն «անելիք չունեն Հայաստանում»։ Հուլիսի 14-ին գործարարը հայտնել էր նոր քաղաքական թիմի ձևավորման մեկնարկի մասին։ Օգոստոսի 15-ին դատարանը 2 ամսով երկարաձգել էր Կարապետյանի կալանքը։

Օգոստոսի 29-ին Երևանում տեղի էր ունեցել Կարապետյանի «Մեր ձևով» շարժման շնորհանդեսը։ Շարժումը, որն աշխատել է 5 ուղղությամբ, ծրագրային աշխատանքները կավարտի 4-5 ամսվա ընթացքում, որից հետո քաղաքական հայտ կներկայացնի։

Կարդացեք նաև՝