ՀՀ ԱԳ նախարար Արարատ Միրզոյանը ԵՄ արտաքին գործերի ու անվտանգության քաղաքականության հարցերով բարձր ներկայացուցիչ Կայա Կալասի հետ հեռախոսազրույցում ընդգծել է Հայաստանի և Ադրբեջանի միջև խաղաղության պայմանագրի նախաստորագրման կարևորությունը, հայտնում է ՀՀ ԱԳՆ-ն։
Ըստ Միրզոյանի՝ տարածաշրջանային հաղորդակցությունների ապաշրջափակման հարցում ձեռքբերված պայմանավորվածության կյանքի կոչումը նշանակալի ազդեցություն կունենա Հարավային Կովկասում և դրանից դուրս փոխկապակցվածության ընդլայնման հարցում:
Կողմերը անդրադարձել են նաև ՀՀ-ԵՄ գործընկերության զարգացման հարցերի և տարածաշրջանային ծրագրերի ներառականության ապահովման կարևորությանը։
Միրզոյանը Ֆրանսիայի Եվրոպայի և արտաքին գործերի նախարար Ժան-Նոել Բարոյի հետ ևս քննարկել է տարածաշրջանային հաղորդակցությունների ապաշրջափակման հարցը։
Ըստ ԱԳՆ-ի՝ կողմերը նշել են պայմանավորվածության կյանքի կոչման արդյունքում տարածաշրջանի երկրների և այլ գործընկերների համար փոխկապակցվածության ավելացման աննախադեպ հնարավորությունները։
Օգոստոսի 8-ին Հայաստանի վարչապետ Նիկոլ Փաշինյանը և Ադրբեջանի նախագահ Իլհամ Ալիևն ԱՄՆ-ի միջնորդությամբ ստորագրել էին խաղաղության ցանկության մասին հռչակագիր, ինչպես նաև TRIPP (Trump Route for International Peace and Prosperity) տարանցիկ միջանցքի ստեղծման մասին համաձայնագիր, որի զարգացումը կապահովվի ամերիկյան կոնսորցիումի վերահսկողության ներքո:
Օգոստոսի 11-ին ՀՀ ԱԳՆ-ն հրապարակել էր Հայաստանի և Ադրբեջանի միջև խաղաղության նախաստորագրված համաձայնագրի տեքստը։ Նույն օրը Հայաստանն Ադրբեջանի հետ համատեղ դիմում էր հղել ԵԱՀԿ-ին՝ Արցախյան հակամարտության կարգավորման գծով Մինսկի խումբը (ՄԽ) լուծարելու մասին։
