Վաշինգտոնի առաջարկած՝ Երևանի և Բաքվի կողմից «ստորագրվելիք փաստաթուղթն օրինականացնում է Ադրբեջանի ցեղասպանական գործողությունները Արցախում», հայտարարել է Ամերիկայի Հայ Դատի հանձնախումբը (ANCA)՝ մեկնաբանելով Հայաստանի վարչապետ Նիկոլ Փաշինյանի, Ադրբեջանի նախագահ Իլհամ Ալիևի և ԱՄՆ նախագահ Դոնալդ Թրամփի միջև սպասվող հանդիպումը։
Կազմակերպության աղբյուրների փոխանցմամբ՝ օգոստոսի 7-8-ի բանակցություններից հետո կարող է հրապարակվել համատեղ հայտարարություն կամ փոխըմբռնման հուշագիր։ ANCA-ն կասկածում է, որ այս փաստաթուղթը չի անդրադառնա հայ ժողովրդի հիմնական առաջնահերթություններին, որոնք են՝ արցախահայերի՝ իրենց տները վերադառնալու իրավունքը, գերիների և պատանդների ազատ արձակումը, քրիստոնեական սրբավայրերի միջազգային պաշտպանությունը, ինչպես նաև ադրբեջանական զորքերի դուրսբերումը Հայաստանի ինքնիշխան տարածքից։
«Եթե Վաշինգտոնը ցանկանում է հանդես գալ որպես խաղաղության միջնորդ Հարավային Կովկասում, ապա պետք է ապահովի, որ խաղաղության գործընթացը լինի իրական՝ հիմնված պատասխանատվության վրա, այլ ոչ թե Հայաստանին ուղղված սպառնալիքների վրա։ Ամերիկահայերը կտրականապես դեմ են ցանկացած համաձայնագրի, որը փոխարինում է արդարադատությունը զիջումներով և վտանգի է ենթարկում հայերի կյանքը»,- ասել է գրասենյակի գործադիր տնօրեն Արամ Համբարյանը։
ՀՅԴ Հայ Դատի կենտրոնական գրասենյակը կոչ է արել առաջիկա հանդիպման մասնակիցներին ձգտել արդարության, պատասխանատվության, բռնի տեղահանված հայ բնակչության վերադարձի, ինչպես նաև Հայաստանի անվտանգության և ինքնիշխանության պահպանման վրա հիմնված սկզբունքային և կայուն խաղաղության։
Օգոստոսի 6-ին ՀՀ կառավարությունից հաստատել էին մամուլում շրջանառվող լուրերը Վաշինգտոնում Փաշինյան-Ալիև-Թրամփ հանդիպման մասին: Նշվում էր, որ օգոստոսի 7-8-ին Փաշինյանը այց կկատարի Ամերիկայի Միացյալ Նահանգներ։
Middle East Eye հրատարակության տեղեկություններով՝ Հայաստանն ու Ադրբեջանը կարող են փոխըմբռնման հուշագիր ստորագրել օգոստոսի 8-ին Սպիտակ տանը՝ ԱՄՆ նախագահի ներկայությամբ։ Ակնկալվում է, որ Երևանն ու Բաքուն պաշտոնապես կհրաժարվեն ԵԱՀԿ Մինսկի խմբին մասնակցելուց։ Reuters-ն էլ հավելում է, որ կստորագրվի շրջանակային համաձայնագիր, որը ԱՄՆ-ին բացառիկ իրավունքներ կտրամադրի Հայաստանի տարածքով անցնող ռազմավարական տրանսպորտային միջանցքի զարգացման համար:
