Դատարանը բավարարել է «Տաշիր» ընկերությունների խմբի նախագահ Սամվել Կարապետյանի պաշտպանների միջնորդությունը՝ Ազգային ժողովի «Քաղաքացիական պայմանագիր» խմբակցության պատգամավոր Արսեն Թորոսյանի գույքի վրա 9 միլիոն դրամի չափով արգելանք կիրառելու վերաբերյալ, Armenia Today-ին տեղեկացրել է Կարապետյանի պաշտպանության խորհրդի փաստաբան Վարդան Ալոյանը։
Թորոսյանի գույքի վրա դրվել է կալանք՝ բացառությամբ նրա աշխատավարձի, հստակեցրել է փաստաբանը։
«Միջնորդություն էինք ներկայացրել, որ արգելանք կիրառվի պատասխանողի գույքի վրա։ Դատարանը հայցի ապահովում է կիրառել»,- հավելել է Ալոյանը։
Նա ընդգծել է, որ միջնորդությունը ներկայացրել են սուտ և զրպարտող հայտարարությունների վերաբերյալ ներկայացված հայցի շրջանակում։
Ալոյանը նշել է, որ նույն բովանդակությամբ, ընդհանուր առմամբ, 11 հայց կա, որոնցից 5-ը դատարանը վարույթ է ընդունել, մնացածի մասով սպասում են վարույթի ընդունմանը։ Նա հստակեցրել է, որ հայցերը վարչապետի մամուլի քարտուղար Նազելի Բաղդասարյանի, վարչապետի աշխատակազմի ղեկավարի տեղակալ Տարոն Չախոյանի, ՔՊ խմբակցության ղեկավար Հայկ կոնջորյանի, քաղաքագետ Հարություն Մկրտչյանի, բլոգեր Ռոման Բաղդասարյանի, Լուսինե Կեսոյանի (2 հայց), Լևոն Շիրինյանի, Ռուբեն Մեհրաբյանի և Civic.am-ի դեմ են։
Փաստաբանը չի բացառել զրպարտության, վիրավորանքի համար նոր հայցերի հնարավորությունը։
«Այս պահին ուսումնասիրում ենք ելույթները, գրությունները։ Եթե նորից վիրավորանք ու զրպարտություն պարունակող նյութեր լինեն, կրկին հայցեր կներկայացնենք։ Արդեն իսկ արդյունք զգում ենք՝ մարդիկ սկսել են առանց վիրավորանքի, զրպարտանքի խոսելու նորմալ դաշտ գալ»,- հավելել է փաստաբանը։
Թորոսյանը համաձայն չէ դատարանի որոշման հետ և պատրաստվում է բողոքարկել այն։
«Միջնորդել եմ դատարանին, որպեսզի վերացնի հայցի ապահովման անհիմն որոշումը, որովհետև չեմ պատրաստվում գույքս վաճառել ու փախնել Հայաստանից, հատկապես՝ Սամոյի ահից։ Կալուգայի Սամոյին և տեռորիստ տերտերներին թվում է, թե դատական հայցերով կարող են մեզ լռեցնել»,- գրել է նա Ֆեյսբուքի իր էջում։
Հուլիսի 4-ին Կարապետյանը զրպարտության և վիրավորանքի համար դատական հայցեր էր ներկայացրել Թորոսյանի և Կոնջորյանի դեմ՝ յուրաքանչյուրից պահանջելով 9 մլն դրամ։
Հունիսի 19-ին դատարանը երկու ամսով կալանավորել էր Կարապետյանին իշխանությունը զավթելու կոչեր հնչեցնելու մեղադրանքով, երբ նա քննադատել էր Ամենայն Հայոց կաթողիկոսի և հոգևորականների դեմ Հայաստանի իշխանությունների արշավը: Փաշինյանը խիստ էր արձագանքել Կարապետյանի հայտարարությանը: Նա չի ընդունում մեղադրանքը և մտադիր է բողոքարկել այն եվրոպական դատարանում: Հուլիսի 4-ին դատարանն անփոփոխ էր թողել Կարապետյանին կալանավորելու որոշումը։
Հուլիսի 4-ին ի աջակցություն Կարապետյանի տեղի ունեցած հանրահավաքին նա փաստաբանների միջոցով կալանավայրից ուղերձ էր հղել՝ կոչ անելով միավորվել նոր քաղաքական ուժի շուրջ: Հուլիսի 14-ին գործարարը տեղեկացրել էր, որ մեկնարկել է քաղաքական թիմի ձևավորումը։
Կարդացեք նաև՝
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյան
Աննա Բադալյան
