Հայաստանի՝ ԱՊՀ կազմից դուրս գալու ցանկության վերաբերյալ որևէ ազդանշան չի նկատվել, այդ տարբերակը բացառվում է, Անկախ պետությունների համագործակցության (ԱՊՀ) տնտեսական խորհրդի 106-րդ նիստում հայտարարել է ԱՊՀ գլխավոր քարտուղար Սերգեյ Լեբեդևը։
«Լիովին բացառում եմ այս տարբերակը, մենք որևէ նշան չենք տեսնում, որ Հայաստանը դուրս է գալու ԱՊՀ-ից։ Նույնը նաև Ադրբեջանի պարագայում է»,- հայտարարել է նա՝ պատասխանելով կազմակերպությունից Հայաստանի դուրս գալու հնարավորության մասին հարցին։
Լեբեդևն ընդգծել է, որ Հայաստանը շարունակում է մասնակցել ԱՊՀ տարբեր նիստերին։
«Այսօր Հայաստանի լիազոր ներկայացուցիչը ներկա էր ԱՊՀ տնտեսական խորհրդի նիստին, խոսեց հարցերի էության մասին, լիազորություններ ուներ ստորագրելու մի շարք փաստաթղթեր»,- նշել է ԱՊՀ գլխավոր քարտուղարը։
Վարչապետ Նիկոլ Փաշինյանը լրագրողների հետ հանդիպման ժամանակ հայտարարել էր, որ ՀԱՊԿ-ից Հայաստանի դուրս գալն ավելի հավանական է համարում, քան այս կազմակերպության անդամակցության վերականգնումը։ Փաշինյանը հաստատել էր ԵՄ-ին միանալու Հայաստանի ցանկությունը։
Անկախ պետությունների համագործակցությունը (ԱՊՀ) հայտարարել էր նոր հարթակ մշակելու մասին՝ «ԱՊՀ պլյուս» անվանմամբ, որին կկարողանան միանալ ինչպես գործընկեր, այնպես էլ դիտորդի կարգավիճակով այն երկրները, որոնք անդամ չեն ԱՊՀ-ին, այդ թվում՝ պետությունների բլոկներ:
