Ութ ամսական երեխայի և ևս երկու անչափահաս երեխաների մայր Լիանա Հարությունյանն ազատ է արձակվել, տեղեկությունն Armenia Today-ին հայտնեց Քրեական դատարանների մամուլի խոսնակ Լիանա Ռաֆայելյանը։
Ըստ Ռաֆայելյանի՝ մեղադրյալի նկատմամբ ընտրվել է համակցված խափանման միջոց՝ վարչական վերահսկողություն ու բացակայության արգելք։
«Խափանման միջոցը փոխելու հիմքն այն էր, որ մեղադրյալը դատարանում պատշաճ վարքագիծ է դրսևորել, բացի այդ՝ նա խնամքին ունի երեք անչափահաս երեխա»,- նշեց նա։
Ռաֆայելյանի խոսքով՝ թեև մի քանի պատգամավոր երաշխավորագիր էր ներկայացրել կալանքի խափանման միջոցը փոխելու համար, սակայն դա դատարանում չի քննարկվել, քանի որ պատգամավորները չեն ներկայացել նիստին։
Չի ներկայացել նաև Հարությունյանի փաստաբան Զարուհի Փոստանջյանը՝ չնայած նրան, որ Փոստանջյանին պատշաճ ծանուցել էին նիստի մասին։ Դատական նիստին չներկայանալը դատավորը համարել է ոչ հարգելի և հեռացրել է նրան վարույթից՝ հաշվի առնելով նախորդ նիստին Փոստանջյանի ստացած նկատողությունները։
Հաջորդ դատական նիստը նշանակված է սեպտեմբերի 9-ին՝ ժամը 11։30-ին, հայտնեց Ռաֆայելյանը։
Մարդու իրավունքների միջազգային դատարանը կառավարությանը հարցեր էր ուղղել 8 ամսական երեխայի պահման վայրի վերաբերյալ։ Փաստաբանը տեղեկացրել էր, որ փոքրիկը դեռ հիվանդանոցում է, ուր տեղափոխվել էր հունիսի 13-ին, ավելի ուշ ԲԿ էր տեղափոխվել նաև Հարությունյանը, քանի որ երեխան մոր խնամքի կարիքն ուներ։
Փաստաբանը նաև նշել է, որ հիվանդանոց տեսակցության է գնացել Արդարադատության նախարար Սրբուհի Գալյանը։ Նա նախարարի այցը կապել է ՄԻԵԴ ծանուցման հետ՝ նշելով, որ «արձագանքը ժամանակավրեպ է»։
Հուլիսի 11-ին Փոստանջյանն ահազանգել էր անչափահաս երեխաներ, այդ թվում՝ 8 ամսական երեխա ունեցող կնոջը կալանավորելու մասին։ Դատարանն սկզբում խափանման միջոց էր ընտրել տնային կալանքը, սակայն վարձակալած տան սեփականատերը հրաժարվել էր թույլ տալ պատիժը կրել իր տանը։ Այնուհետև դատավոր Արշակ Մաթևոսյանը նրան կալանավորելու որոշում էր կայացրել, ինչի հետևանքով կնոջ հետ բանտախուց էր տեղափոխվել նաև 8 ամսական աղջիկը։ Կնոջը մեղադրում են անօրինական միգրացիայի կազմակերպման օժանդակության համար։
Հուլիսի 13-ին Փոստանջյանն հայտնել էր, որ «Աբովյան» քրեակատարողական հիմնարկի բանտախուցը, ուր գտնվում են կինն ու երեխան, չունի տաք ջուր և տաք ջուր ապահովող սարք։ Նա նաև ընդգծել էր, որ երեխան առողջական խնդիրներ է ձեռք բերել, բայց պատշաճ բուժօգնություն չի տրամադրվում։ Քրեակատարողական ծառայությունը հերքել էր փաստաբանի՝ պահման վայրի մասին պնդումները, միևնույն ժամանակ տեղեկացրել, որ երեխային հիվանդանոց են տեղափոխել։
