ԱՄՆ Կոնգրեսում Հայաստանի հարցերով խմբի փոխնախագահ, կոնգրեսական Բրեդ Շերմանը մտահոգություն է հայտնել ընդդիմադիրների, հոգևորականների, ինչպես նաև «Տաշիր» ընկերությունների խմբի նախագահ Սամվել Կարապետյանի ձերբակալության առնչությամբ։
Կոնգրեսականը տեղեկացրել է, որ այդ մտահոգությունները փոխանցել է ԱՄՆ-ում Հայաստանի դեսպանին։
«Խորապես մտահոգված եմ հայ ընդդիմադիրների, պարոն Կարապետյանի և հայ եկեղեցու հոգևորականների ձերբակալություններով: Հայաստանի հետ մեր հարաբերությունները հիմնված են ժողովրդավարության ընդհանուր հանձնառության վրա»,- գրել է Շերմանը։
Հունիսի 19-ին դատարանը երկու ամսով կալանավորել էր Կարապետյանին իշխանությունը զավթելու կոչեր հնչեցնելու մեղադրանքով, երբ նա քննադատել էր Ամենայն Հայոց կաթողիկոսի և հոգևորականների դեմ Հայաստանի իշխանությունների արշավը: ՀՀ վարչապետ Նիկոլ Փաշինյանը խիստ էր արձագանքել Կարապետյանի հայտարարությանը: Գործարարը չի ընդունում մեղադրանքը և մտադիր է բողոքարկել այն եվրոպական դատարանում: Հուլիսի 4-ին դատարանն անփոփոխ էր թողել Կարապետյանին կալանավորելու որոշումը։
Իրավապահ մարմինները հունիսի 25-ի և 27-ի խուզարկություններից հետո երկու ամսով կալանավորել էին «Սրբազան շարժման» առաջնորդ Բագրատ արքեպիսկոպոս Գալստանյանին ու Շիրակի թեմի առաջնորդ Միքայել արքեպիսկոպոս Աջապահյանին, ինչպես նաև շարժման 14 աջակցի։ Գալստանյանը և «Սրբազան պայքարի» աջակիցները մեղադրվում են պետական հեղաշրջման և ահաբեկչության նախապատրաստության փորձ կազմակերպելու մեջ։ Նրանցից ոչ ոք չի ընդունում մեղադրանքը:
Հուլիսի 10-ին իրավապահներն ահաբեկչության նախապատրաստության դեպքի առթիվ նախաձեռնված քրեական վարույթի շրջանակներում խուզարկություններ էին սկսել դաշնակցականների տներում, հուլիսի 9-ին 2 ամսով կալանավորել էին «Հայաստան խմբակցության» պատգամավոր Արթուր Սարգսյանին։
Կարդացեք նաև՝
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյան
