ՀՀ վարչապետ Նիկոլ Փաշինյանն Աբու Դաբիում ԱՄԷ նախագահ, շեյխ Մուհամմադ բին Զայեդ Ալ Նահյանի հետ հանդիպմանը նշել է, որ Հայաստանը գնահատում է ԱՄԷ-ի դերը տարածաշրջանային կայունության և միջազգային անվտանգությանը նպաստելու գործում։
Ըստ կառավարության մամուլի ծառայության՝ հանդիպման ընթացքում քննարկվել են տարածաշրջանային նշանակության և փոխադարձ հետաքրքրություն ներկայացնող հարցեր: Կողմերն ընդգծել են երկու երկրների միջև տնտեսական, ներդրումային ու հումանիտար ոլորտներում փոխգործակցության զարգացման լայն հնարավորությունները։
Ալ Նահյանը ողջունել է Հայաստանի և Ադրբեջանի միջև խաղաղության պայմանագրի նախագծի համաձայնեցումը և հնարավորինս շուտ ստորագրման հույս հայտնել:
Այսօր ավելի վաղ Ադրբեջանը և Արաբական Միացյալ Էմիրությունները Համապարփակ տնտեսական գործընկերության մասին համաձայնագիր էին ստորագրել։
Հուլիսի 9-ին Փաշինյանն աշխատանքային այցով ժամանել էր ԱՄԷ: Վաղը՝ հուլիսի 10-ին, Աբու Դաբիում կայանալու է վարչապետի հանդիպումն Ադրբեջանի նախագահ Իլհամ Ալիևի հետ:
