«Հայաստանի էլեկտրական ցանցեր» ընկերության տնօրենների խորհրդի նախագահ և «Տաշիր» ընկերությունների խմբի փոխնախագահ Նարեկ Կարապետյանը բերման չի ենթարկվել, նրա կարգավիճակը պաշտոնապես դեռ որոշված չէ. «Տաշիր» խմբի մամուլի ծառայությունից Armenia Today-ին հայտնել են, որ նա սպասում է հարցաքննության հրավերի՝ մեկնաբանելով հուլիսի 8-ի առավոտյան Կարապետյանի բնակարանում, ինչպես նաև ընկերության կենտրոնական գրասենյակում իրավապահների իրականացրած խուզարկությունները։ Ընկերությունից նշել են, որ խուզարկությունները շարունակվում են։
«ՀԷՑ-ի ղեկավարությունը և աշխատակիցները լիարժեք աջակցություն են ցուցաբերում քննչական մարմիններին՝ օրենքի շրջանակում»,- ընդգծել են մամուլի ծառայությունից։
Միևնույն ժամանակ, «Տաշիր»-ում մտահոգություն են հայտնել իրականացվող քննչական գործողությունների մասշտաբների կապակցությամբ և տեղի ունեցողը որակել քաղաքական դրդապատճառներով պայմանավորված։
«Հաշվի առնելով համատեքստն ու վերջին շաբաթվա իրադարձությունները՝ բոլոր հիմքերն ունենք կարծելու, որ տեղի ունեցողը դուրս է ստանդարտ քրեական գործընթացի սահմաններից և ունի քաղաքական դրդապատճառներ»,- նշված է մամուլի ծառայության հայտարարությունում։
Ընկերությունում շեշտել են բաց գործունեության և օրինականության սկզբունքների հանդեպ իրենց հավատարմությունը։
««Տաշիր» խումբը մնում է բաց, օրինական և կառուցողական երկխոսության սկզբունքներին հավատարիմ։ Իրավապահ մարմիններին կոչ ենք անում գործել բացառապես Սահմանադրության և քրեական դատավարության օրենսգրքի շրջանակում՝ բացառելով ցանկացած ճնշում կամ ցուցադրականություն»,- եզրափակել են մամուլի ծառայությունից։
Այսօր ավելի վաղ Armenia Today-ը հայտնել էր ՀԷՑ-ում և Կարապետյանի բնակարանում խուզարկությունների մասին: Քննչական կոմիտեից Armenia Today-ին հաստատել էին, որ կոմիտեի տնտեսական հանցագործությունների և մաքսանենգությունների քննության գլխավոր վարչությունում և Երևան քաղաքի քննչական վարչությունում նախաձեռնված քրեական վարույթների շրջանակներում կատարվում են անհետաձգելի քննչական գործողություններ: Կարապետյանը տեղափոխվել էր ոստիկանություն: Նա հայտարարել էր, որ սպասում է իր ձերբակալմանը:
Նարեկ Կարապետյանը հուլիսի 4-ին Երևանում անցկացված երթի առաջնորդներից մեկն էր: Ակցիայի ընթացքում նա կոչ էր արել ժողովրդական միասնության։ Այդ նույն ակցիայի ընթացքում ընթերցվել էր «Տաշիր» ընկերությունների խմբի նախագահ Սամվել Կարապետյանի ուղերձը, որում նշվում էր, որ վարչապետ Նիկոլ Փաշինյանն այլևս անելիք չունի Հայաստանում։ Կարապետյանը շեշտել էր նոր քաղաքական ուժ ձևավորելու անհրաժեշտության մասին։
