Մարդու իրավունքների պաշտպանները արձանագրել են, որ վերջին երեք ամիսների ընթացքում Երուսաղեմի Հին քաղաքում ատելության հողի վրա կատարված հանցագործությունների կեսը տեղի է ունեցել Հայկական թաղամասում, հայտնել է «Հայկական թաղամասի փրկարարական շարժման» ներկայացուցիչ Գեղամ Բալյանը՝ հղում անելով Իսրայելի կրոնական ազատության տվյալների կենտրոնի (RFDC) ուսումնասիրությանը:
Հարձակումները թիրախավորել են թե՛ հայ հոգևորականներին, թե՛ քաղաքացիական անձանց: Գրանցված միջադեպերի թվում են թքելը, բանավոր վիրավորանքները, անօրինական մուտքը, սրբավայրերի պղծումը և վանդալիզմի ակտերը՝ ըստ «Իսրայելում քրիստոնյաների դեմ միջադեպեր» եռամսյակային զեկույցի:
Բալյանն ընդգծել է, որ մայիսին Իսրայելի խորհրդարանն անցկացրել էր իր առաջին քննարկումը երկրում քրիստոնյաների հալածանքների վերաբերյալ, որին իրենց վկայությունները ներկայացրել են լատինական, հայկական, ուղղափառ, ղպտիական և անգլիկան եկեղեցիների ներկայացուցիչները: Առաջիկա ամիսներին նախատեսվում են լրացուցիչ նիստեր՝ Իսրայելի ոստիկանության և քաղաքապետարանի ներկայացուցիչների մասնակցությամբ: Բալյանը վստահ չէ, որ այս քննարկումները կհանգեցնեն քրիստոնեական համայնքների պաշտպանության իրական միջոցառումների և ձևականություն չեն լինի։
RFDC-ն անկախ նախաձեռնություն է, որը հիմնադրվել է 2023 թվականի հունիսին իսրայելցի ակտիվիստ, գիտնական և քրիստոնեական պատմության ու միջկրոնական հարաբերությունների փորձագետ Յիսկա Հարանիի կողմից: Կենտրոնը ստեղծվել է Երուսաղեմում, մասնավորապես՝ Հին քաղաքում, քրիստոնեական հալածանքների նկատելի աճի ֆոնին: Կենտրոնի հիմնական առաքելությունն է փաստաթղթավորել, զեկուցել և նպաստել Իսրայելում քրիստոնյա հավատացյալների, հոգևորականների և հաստատությունների նկատմամբ հալածանքների և բռնության դեպքերի վերաբերյալ արձագանքին:
2023 թվականի դեկտեմբերի 28-ին շուրջ 30 սադրիչ հարձակվել էր «Կովերի պարտեզում» գտնվող հայերի վրա։ Երուսաղեմի Հայոց պատրիարքարանը հայտարարել էր, որ նրանք ղեկավարվում են տարածքի նկատմամբ հավակնություններ ունեցող Xana Capital ընկերության կողմից։
2023 թվականի հունվարին Երուսաղեմում հրեա արմատականները հարձակվել էին հայերի վրա և փորձել պոկել Հայ առաքելական եկեղեցու Երուսաղեմի պատրիարքարանի շենքի դրոշները։ Նույն տարվա հունվարի 27-ին հրեա ծայրահեղականները սադրել էին Երուսաղեմի Taboon Wine Bar հայկական ռեստորանի աշխատակիցներին ու այցելուներին։
2024-ի սեպտեմբերին Xana Gardens ընկերությունը, որը հավակնում է Երուսաղեմի Հին քաղաքի հայկական թաղամասի «Կովերի պարտեզ» հողամասին, հայց էր ներկայացրել թաղամասի փրկության շարժման համահիմնադիրներ Հակոբ Ջերնազյանի և Սեթրագ Բալյանի դեմ։
