Ատոմային Էներգիայի միջազգային գործակալության (ՄԱԳԱՏԷ) կառավարիչների խորհուրդը հայտարարել է, որ Իրանը խախտել է միջուկային զենքի չտարածման վերաբերյալ իր պարտավորությունները, հայտնում Է Reuters-ը:
Նշվում է, որ ՄԱԳԱՏԷ-ի կողմից համապատասխան բանաձևի ընդունումը մեծացնում է այդ կապակցությամբ գործակալության՝ ՄԱԿ-ի Անվտանգության խորհուրդ դիմելու հավանականությունը:
Վիեննայում միջազգային կազմակերպություններում ՌԴ մշտական ներկայացուցիչ Միխայիլ Ուլյանովը հայտարարել է, որ Իրանի դեմ բանաձևն ընդունվել է 19 կողմ ձայնով: Դիվանագետի տեղեկացմամբ՝ երեք երկիր՝ Ռուսաստանը, Չինաստանը և Բուրկինա Ֆասոն, դեմ են քվեարկել, իսկ 11 պետություն ձեռնպահ է մնացել: Նշենք, որ Հայաստանը ևս ՄԱԳԱՏԷ-ի Կառավարիչների խորհրդի կազմում է:
Բանաձևի ընդունումից հետո Reuters-ը, վկայակոչելով ՄԱԳԱՏԷ-ի ներկայացուցչին, հայտնել է, որ Իրանն ի պատասխան՝ գործակալությանը տեղեկացրել է ուրանի հարստացման երրորդ կենտրոն բացելու իր ծրագրերի մասին: Իրանի ատոմային Էներգիայի կազմակերպության ներկայացուցիչ Բեհրուզ Քամալվանդին հայտարարել է, որ Թեհրանը ՄԱԳԱՏԷ-ին տեղեկացրել է երկու հակաքայլի մասին, ներառյալ՝ Ֆորդոյի միջուկային օբյեկտում «ցենտրիֆուգների արդիականացումը»՝ «առաջինից վեցերորդ սերունդ»:
Բացի դրանից, Իրանի խորհրդարանի ազգային անվտանգության կոմիտեի անդամ Վահիդ Ահմադին հայտարարել է, որ ՄԱԳԱՏԷ-ի բանաձևի ընդունումը կարող է ստիպել Թեհրանին դուրս գալ միջուկային զենքի չտարածման մասին պայմանագրից, հաղորդում է ՏԱՍՍ-ը:
ՄԱԳԱՏԷ-ի որոշումից հետո Իսրայելի ԱԳՆ-ն հայտարարել է, որ Թեհրանի գործողությունները «խափանում են միջուկային զենքի չտարածման մասին պայմանագիրը և անմիջական սպառնալիք են ներկայացնում տարածաշրջանային և միջազգային անվտանգության ու կայունության համար»:
ՄԱԳԱՏԷ-ի որոշումը կայացվել է տարածաշրջանում լարվածության աճի ֆոնին, երբ ԱՄՆ-ն որոշել է մասնակի տարհանել Բաղդադում իր դեսպանատունը և թույլատրել Մերձավոր Արևելքում ամերիկացի զինծառայողների ընտանիքի անդամներին լքել տարածաշրջանը: Ավելի վաղ Վաշինգտոնն ու Թեհրանն Իրանի միջուկային ծրագրի շուրջ անուղղակի բանակցությունների 5 փուլն էին անցկացրել:
