Հայաստանի ԶՈւ գլխավոր շտաբը բացասական կարծիք է հայտնել գումարի դիմաց կարճաժամկետ ծառայելու մասին նախագծին՝ նշելով՝ «դեմ ենք», հայտնել է «Հրապարակ» օրաթերթը:
Ըստ թերթի՝ փակ նիստ է տեղի ունեցել, որին ներկա ԳՇ պետ Էդվարդ Ասրյանն անձամբ է տեղեկացրել այդ մասին։ Նա չի թաքցրել տարակուսանքը, թե ինչո՞ւ է իրենց եզրակացությունից հետո Պաշտպանության նախարար Սուրեն Պապիկյանը նախագիծը ներկայացրել կառավարության նիստ, որտեղ դրական եզրակացություն է ստացել, պատմել է լրատվականը։
Պապիկյանը պատասխանել է, թե զորակոչի պակաս կա, այն լրացնելու խնդիր ունեն, պետք է քայլեր ձեռնարկեն, գրել է թերթը։
Մայիսի 22-ին կառավարությունը հավանություն էր տվել «Քաղաքացիական պայմանագրի» պատգամավոր Հայկ Սարգսյանի նախագծին, ըստ որի՝ ովքեր ցանկանում են ծառայել 24 ամսից քիչ, կարող են որոշակի գումար վճարել պետբյուջե։ Մեկ ամսվա ծառայության դեպքում վճարը կլինի 24 մլն դրամ (62,5 հազար դոլար), իսկ 4 ամսվա ծառայության համար՝ 18 մլն դրամ (46,8 հազար դոլար)։
